पोखरा, २२ माघ । संघीयताको कार्यान्वयनको चरणमा यो खर्चिलो र राज्यले धान्न नसक्ने भन्दै केह असन्तुष्टि पनि नआएका होईनन् । राष्ट्रिय जनमोर्चाले भने पहिल्यैदेखि संघीयताको विरोध गर्दै आएको छ । प्रदेश नं. ४ को पहिलो प्रदेश सभा बैठकमा पनि विरोध भएको छ ।

संघीय संरचना अनुसार निर्वाचित भएर संसद प्रबेश गरेका राष्ट्रिय जनमोर्चाका सांसदले संघीय शासन ब्यवस्थामा आफुहरु असहमत रहेको बताए । बागलुङबाट निर्वाचित जनमोर्चाका सांसद कृष्ण थापाले आफ्नो पार्टीको संघीयता प्रतिको असन्तुष्टी कायमै रहेको धारणा राखे । ‘संघीयताप्रति हाम्रो असहमति छ र यो असहमति यथवात रहन्छ’, बैठकलाई सम्बोधन गर्दै उनले भने–‘संघीयता अहिले हिराको सिक्रिले बाँधेको भालु जस्तो भएको छ । बाँधिराखौं भने महंगो पर्छ, छोडौं भने जनताको बलिदान सकिन्छ ।’

उनले दक्षिण र उत्तरको प्रभावमा नपरी प्रदेश बलियो बनाउन लागि पर्नुपर्ने बताए । थापा नेकपा एमाले र माओवादी केन्द्रसँगको तालमेलबाट चुनाव जित्दै प्रदेश सभामा पुगेका हुन् । जनमोर्चाले गणतन्त्रका पक्षपाती एमाले र माओवादीसँग बागलुङ र प्युठानसहितका जिल्लामा चुनावी तालमेल गरेको थियो । जनमोर्चाका अध्यक्ष चित्रबहादुर केसी संघीयता कडा आलोचकमध्ये एक हुन् ।

उसो त नेपाली काँग्रेसकै वरिष्ठ नेताहरुले समेत संघीयता मुलुकले धान्न नसक्ने समाचार सावैजनिक भएको छ । दलहरु अब चाहेर पनि पछाडि फर्कन सक्ने अवस्था भने छैन ।