तनहुँ । तनहुँको बन्दिपुर-५ याम्पाका कोरोना संक्रमितका परिवारसहित बन्दिपुर गाउँपालिकाका ४६ जनाको पीसीआर रिपोर्ट नेगेटिभ आएको छ ।

याम्पाका एक पुरुषमा गत साउन २७ गते कोरोना संक्रमण पुष्टि भएको थियो ।

स्थानीय निर्माण व्यवसायी रहेका युवामा कोरोना देखिएपछि कन्ट्रायाक्ट ट्रेसिङका आधारमा याम्पाका ४० जनाको स्वाब संकलन गरिएको बन्दिपुर गाउँपालिका अध्यक्ष पूर्णसिं थापाले बताए ।

त्यस्तै क्वारेन्टाइनमा बसेका अन्य ६ जनाको समेत स्वाब संकलन गरी परीक्षणमा गरिएको थियो । सबै ४६ जना कै रिपोर्ट नेगेटिभ आएको गाउँपालिका अध्यक्ष थापाले जानकारी दिए ।

कोरोना पोजिटिभ देखिएका पुरुषका परिवारको रिपोर्ट पनि नेगेटिभ आएको अध्यक्ष थापाले बताए ।

समुदायमा कोरोना संक्रमीत भेटिए संगै गाउँपालिकाले गत साउन ३० गतेदेखि १ हप्ताका लागि गाउँपालिका सिल गरेको छ । सिल गरेपछि आवातजावत ठप्प रहेको अध्यक्ष थापाले जानकारी दिए ।

उनले भने ‘अहिले सर्वसाधारण नै आफै सचेत भएर बस्नुभएको छ ।’

अहिलेसम्म बन्दिपुर गाउँपालिकामा २६ जनामा कोरोना संक्रमण पुष्टि भएको छ । जसमध्य ३ जना आइसोलेसनमा रहेका छन ।

मास टेस्टिङको तयारी

बन्दिपुर गाउँपालिकाले समुदायमा मास टेस्टिङ गर्ने तयारी गरेको छ ।

गाउँपालिकाले वडा नम्बर १ को डुम्रे बजारमा पनि समुदायका व्यक्तिमा कोरोना परीक्षण गर्ने भएको छ ।

भानु नगरपालिकाका व्यक्तिको सम्पर्कमा आएका, पसल, बैक, प्रहरी कार्यालय लगायतका व्यक्तिको कोरोना परीक्षण गरिने अध्यक्ष थापाले जानकारी दिए ।

कन्ट्रयाक्ट ट्रेसिंङको काम भईरहेको र अहिलेसम्म ८० भन्दा व्यक्तिहरुको नाम लिस्ट आइसकेको थापाले बताए ।