तनहुँ । जिल्ला प्रहरी कार्यालय तनहुँले नकवजनी चोरी मुद्दाका फरार एक प्रतिवादीलाई १८ वर्षपछि पक्राउ गरेको छ ।

पक्राउ पर्नेमा तनहुँको ऋषिङ गाउँपालिका–१ गैह्राखुदी बस्ने ३८ वर्षीय पूर्णबहादुर आले रहेका छन् ।

उनलाई पनि शनिबार राति घरबाटै पक्राउ गरिएको जिल्ला प्रहरी कार्यालय तनहुँका प्रहरी नायब उपरिक्षक तिमिल्सिनाले जानकारी दिए ।

आलेविरुद्ध जिल्ला अदालतले वि सं २०५९ साल वैशाख १६ गते दुई वर्ष ७ महिना २१ दिन कैद र ८ हजार २ सय ५० रुपैयाँ जरीवानाको फैसला सुनाएको थियो ।

पक्राउ परेका आलेलाई आइतबार अदालत पेश गरिएकामा अदालतको आदेश बमोजिम कैद भुक्तानका लागि कारागार चलान गरिएको प्रहरीले जनाएको छ ।

प्रहरीले विभिन्न अपराध एवं मुद्दाहरुमा संलग्न रही फरार रहेका तथा अदालतबाट फैसला भई दण्ड, जरीवाना, दसौदी, कोर्ट फि र सरकारी बिगो तिर्न बाँकी भएका व्यक्तिहरुको खोजीकार्यलाई तीव्र पारेको छ ।

डाँका चोरी मुद्दामा फरार २० वर्षपछि पक्राउ

त्यस्तै डाँका चोरी मुद्दामा फरार रहेका एक प्रतिवादी २० वर्षपछि पक्राउ परेका छन् ।

पक्राउ पर्नेमा तनहुँको ऋषिङ गाउँपालिका–२ केउरानी बस्ने ७६ वर्षीय खेमलाल आले रहेको जिल्ला प्रहरी कार्यालय तनहुँले जनाएको छ ।

उनलाई शनिबार राति सम्बन्धित घर वतनबाटै पक्राउ गरिएको जिल्ला प्रहरी कार्यालय तनहुँका प्रहरी नायब उपरिक्षक युवराज तिमिल्सिनाले जानकारी दिए ।

आलेविरुद्ध जिल्ला अदालत तनहुँले विसं २०५७ साल भदौ १४ गते तीन वर्ष कैदको फैसला सुनाएको थियो ।

पक्राउ परेका आलेलाई आइतबार अदालत पेश गरिएकामा अदालतको आदेश बमोजिम कैद भुक्तानका लागि जिल्ला कारागार चलान गरिएको छ ।