तनहुँ । जिल्ला प्रहरी कार्यालय तनहुँले गर्भपतन र जबरजस्ती करणी मुद्दामा फरार रहेका एक जनालाई पक्राउ गरेको छ ।

पक्राउ पर्नेमा जिल्लाको साबिक भिरकोट गाविस वडा नं ९ हाल ऋषिङ गाउँपालिका वडा नं ३ खाल्डीबास बस्ने वर्ष ५९ को बल बहादुर विक रहेका छन् ।

तनहुँ जिल्ला अदालतको २०७२ माघ १० गतेको गर्भपतन मुद्दाको फैसला र २०७३ फागुन २२ गतेको जबरजस्ती करणी मुद्दाको फैसलामा तोकिएको कैद तथा जरिवाना मध्ये गर्भपतन मुद्दामा १० महिना १२ दिन कैद, जबरजस्ती करणी मुद्दामा ५ वर्ष २ महिना २४ दिन कैद र ५० हजार जरिवाना भुक्तान गर्न बाँकी रहेका विकको खोजतलास गर्ने क्रममा हिजो भदौ ७ गते आइतबार बेलुकी उनको सम्बन्धित घर बस्दै गरेको अवस्थामा प्रहरील पक्राउ गरेको हो ।

कानूनी रितपुर्वक पक्राउ गरी तनहुँ जिल्ला अदालत समक्ष पेश गरेकोमा बाँकी रहेको कैद भुक्तानको लागी कारागार कार्यालय तनहुँमा पठाएको जिल्ला प्रहरी कार्यालय तनहुँका प्रहरी नायव उपरीक्षक युवराज तिमिल्सिना जानकारी दिए ।

जिल्ला प्रहरी कार्यालय तनहुँले विभिन्न अपराध एवं मुद्दाहरुमा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगो समेत तिर्न बाँकी भएका व्यक्तीहरुको खोजी गर्ने कार्य तिब्रता दिदै आएको छ ।