तनहुँ । तनहुँको आँबुखैरेनी गाउँपालिकाले गाउँपालिका क्षेत्र भित्रै आइसोलेसन बनाउने भएको छ ।

बुधबार आँबुखैरेनी गाउँपालिका र आँबुखैरेनी गाउँपालिका वडा नं. ३ स्थित रहेको शिवमन्दिर संरक्षण समिति, मनकामना चोक टोल सुधार समिति, स्थानीय समाजसेवी तथा सरोकारवालाहरुको संयुक्त बैठक बसेको थियो ।

उक्त बैठकबाट शिवालय मन्दिर नजिक रहेको भवनमा १२ बेडको आईसोलेसन कक्ष निर्माण गर्ने निर्णय भएको आँबुखैरेनी गाउँपालिकाका अध्यक्ष गिरबहादुर थापाले बताए ।

विश्वभर द्रुतगतीमा फैलिएको कोरोना भाइरस (कोभिड–१९) समाजमा नै फैलने क्रममा रहेको हुँदा आफ्नै पालिकामा आइसोलेसन बनाउन लागिएको अध्यक्ष थापाले जानकारी दिए ।

आँबुखैरेनी गाउँपालिका बासीहरुलाई कोभिड–१९ पोजेटिभ देखिएता पनि अन्यत्र स्थान लैजानु भन्दा आफ्नै क्षेत्रमा राख्न सहज हुनुका साथै बिरामीहरु लाई पारिवारीक वातावरण महशुस हुने भएकोले आफ्नै आईसोलेसन कक्ष निर्माण गर्न लागिएको गाउँपालिकाका प्रमुख प्रशासकीय अधिकृत विष्णु प्रसाद पोखरेलले जानकारी दिए ।

आफ्नै आईसोलेसन कक्ष हुँदा कोरोना संक्रमित लाई तुरुन्तै आईसोलेसन कक्षमा लैजान सकिने र बिरामीले उपचार समेत छिट्टै प्राप्त गर्ने भएको हुँदा आईसोलेसन निर्माण गर्न लागिएको गाउँपालिकाका सूचना अधिकारी सिखरलाल डोटेलले बताए ।

उक्त बैठकमा गाउँपालिका प्रमुख प्रशासकीय अधिकृत, वडा नं. ३ का अध्यक्ष, टोल सुधार समितिका अध्यक्ष, स्थानीय समाजसेवी लगायतले आफ्नो मन्तव्य राखेका थिए ।