गण्डकी प्रदेशमा शुक्रबार एकै दिन ८९ संक्रमित थपिएका छन् । पछिल्लोपटक अपरान्ह ३ बजे गण्डकी प्रदेश स्वास्थ्य निर्देशनालयले जारी गरेको तेस्रो विज्ञप्ती अनुसार गोरखामा ६ जना संक्रमित थपिएका छन् । यसअघि आजै प्रदेशभर ८३ संक्रमित भेटिएका थिए । कोरोना संक्रमितको संख्या २४०३ पुगेको छ ।

आज जारी गरेको दोस्रो विज्ञप्ती अनुसार पोखरा महानगरपालिकाका १ जनासहित गण्डकी प्रदेशमा थप ४३ जनालाई कोरोना संक्रमण पुष्टि भएको थियो । पोखराको वडा नम्बर ५ का ३२ वर्षीय पुरुषलाई कोरोना भाइरस संक्रमण पुष्टि भएको हो ।

नवलपरासीका (ब.सु.पू) का २४ जनालाई कोरोना भाइरस संक्रमण पुष्टि भएको छ । क्षयरोग उपचार केन्द्र पोखरा तथा अन्य प्रदेशमा प्रयोगशालामा गरिएको परीक्षणका क्रममा नवलपुरका २४ जनालाई एकैपटकमा पुष्टि भएको हो । कोरोना भाइरस संक्रमित हुनेमा जिल्लाको गैंडाकोट नगरपालिका, कावासोती, देवचुली तथा विनयत्रिवेणीका रहेका छन् ।

यस्तै, क्षयरोग उपचार केन्द्र पोखरामा गरिएको परीक्षणका क्रममा गोरखाका १६ जनालाई कोरोना संक्रमण पुष्टि भएको छ । जिल्लाको गोरखा नगरपालिका वडा नम्बर १३ का ९ महिला र ६ जना पुरुषलाई संक्रमण पुष्टि भएको हो । जिल्लाको अजिरकोट गाउँपालिकाका १ जना पुरुषलाई संक्रमण पुष्टि भएको छ । उनी कति नम्बर वडाका बासिन्दा हुन् भन्ने खुलेको छैन । संक्रमित व्यक्ति भारतबाट आएको बताइएको छ ।

यसैगरी, मनाङको चामे गाउँपालिकामा कार्यरत १ जना प्रहरीलाई कोरोना संक्रमण पुष्टि भएको छ । स्याङ्जामा थप १ जनालाई संक्रमण पुष्टि भएको छ । उनी जिल्लाको भीरकोट नगरपालिकाका हुन् । उनी कति नम्बर वडाका बासिन्दा हुन् भन्ने खुलेको छैन ।

त्यसअघि, शुक्रबार पोखरामा एकैपटक १६ जनामा कोरोना संक्रमण पुष्टि भएको हो । स्वास्थ्य निर्देशनालयको बिहानको पहिलो अद्यावधिक विवरण अनुसार पोखरा महानगरपालिकाका ८ वडाका १६ जनाको परीक्षण रिपोर्ट पोजेटिभ आयो ।

क्षयरोग उपचार केन्द्रमा गरिएको पीसीआर परीक्षणमा पोखरा १२ का २८ वर्षीया महिला, पोखरा १० का २३, २४ र २६ वर्षका पुरुष, पोखरा २७ का १८ र ४७ वर्षका पुरुष, पोखरा १४ का २५ वर्षीय पुरुष, पोखरा ५ का ५० वर्षीय पुरुष, पोखरा ३० का २८ वर्षीय पुरुषमा कोरोना संक्रमण देखिएको छ भने पोखरा १५ मा नेपाल प्रहरीमा कार्यरत २६, ३१, २८, २९, २६, २९ र २७ वर्षका गरी ७ जना प्रहरीमा कोरोना संक्रमण पुष्टि भएको निर्देशनालयले पुष्टि गरेको छ ।

पोखरामा आज संक्रमण पुष्टि भएका मध्ये दुई जना महिला स्वास्थ्य विज्ञान प्रतिष्ठानको क्लिनिकमा कोरोना परीक्षण गर्न आएका हुन् भने अन्य सबै कन्ट्याक्ट ट्रेसिङबाट पहिचान भएका हुन् । यस बाहेक बिहान नै नै गण्डकी प्रदेशका अन्य जिल्ला तनहुँका २, लमजुङका ३, स्याङ्गजाका १ र नवलपुरका १७ जनामा कोरोना संक्रमण देखिएको छ ।