तनहुँ । तनहुँको सदरमुकाम दमौलीमा आज बुधबारदेखी हर्न बजाउन नपाइने भएको छ ।

साथै नो स्पिड र नो ओभरटेक लगाएतका नियमहरु समेत सुरु भएको जिल्ला ट्राफिक कार्यालय तनहुँले जनाएको छ ।

यसैबीच तनहुँ ट्राफिकको उक्त कार्य लाई सहयोग पुर्‍याउन तनहुँ उद्योग वाणिज्य संघ एवं दमौली बजार इकाईले नियमसहितको सवारी साधन संकेत बोर्ड जिल्ला ट्राफिक प्रहरी कार्यालय तनहुँलाई हस्तान्तरण गरेका छन ।

उक्त बोर्ड दमौलीको मादी पुलदेखी बुल्दी पुल सम्म राखिने तनहुँ उद्योग वाणिज्य संघ दमौली बजार इकाईका सभापति राजकुमार श्रेष्ठ ‘राकु’ले बताए ।

उनले भने ‘बोर्ड मादी पुल नजिक, ट्राफिक कार्यालय नजिक, भोर्लेटार चोक र बुल्दी पुल नजिक राखिनेछ ।’

सो बोर्डमा नो स्पिड, तिब्र गतिमा सवारी नचलाऔ, नो ओभरटेक, ओभरटेक नचलाऔ, हर्न नबजाऔ लगाएतका नियम लेखिएको छ ।

बजार क्षेत्रमा कति स्पिडमा चलाउने भन्ने छिट्टै नै बोर्डमा लेखिने सभापति श्रेष्ठले बताए । ‘ध्वनि प्रदुषण कम गर्न नो हर्न लागू गरिएको हो ।’ श्रेष्ठले भने ‘बजार क्षेत्रमा हुने दुर्घटना न्यूनीकरण गर्न नो स्पिड र नो ओभरटेक नियम सुरु गरिएको हो ।’

कार्यक्रमको प्रमुख अतिथि तनहुँ उद्योग वाणिज्य संघका अध्यक्ष मानकाजी श्रेष्ठले ट्राफिक प्रहरीको सवारी व्यवस्थापन कार्यमा उद्योग वाणिज्य संघ सदैव साथमा रहेको बताए । साथै सामाजिक दुरी र सुरक्षाका उपाय अपनाएर व्यापार व्यवसाय सुरु गर्नुपर्ने अध्यक्ष श्रेष्ठले बताए ।

उद्योग वाणिज्य संघको सहयोगमा राखिएको सिसिटिभिले विभिन्न घटनाको अनुसन्धानमा सहयोग पुगेको जिल्ला प्रहरी कार्यालय तनहुँका प्रमुख एसपी अरुण पौडेलले बताए ।

उनले भने ‘प्रविधिको प्रयोगले दोषीलाई कानुनी दायरामा ल्याउन र कारबाही प्रक्रिया अगाडी बढाउन सजिलो भएको छ ।’

सवारी साधन व्यवस्थापनमा नियमसहितको संकेत बोर्डले सहयोग पुर्‍याउने एसपी पौडेलले बताए ।

पृथ्वी राजमार्गको तनहुँ खण्ड मुग्लिनदेखी कोत्रे सम्म हुने सडक दुर्घटना न्यूनीकरणका लागी धेरै काम गर्नुपर्ने उनले बताए ।

कार्यक्रममा जिल्ला ट्राफिक कार्यालय तनहुँका प्रमुख रेशम रानाभाट, व्यास-२ का वडा अध्यक्ष काशीराम श्रेष्ठ, व्यास-३ का वडाअध्यक्ष प्रेमकुमार श्रेष्ठ लगाएतको उपस्तिथिती रहेको थियो ।

कार्यक्रमको स्वागत तनहुँ उद्योग वाणिज्य संघका प्रथम उपाध्यक्ष वैकुण्ठनाथ मिश्र र संचालन संघका सचिव दधिराज घिमिरेले गरेका थिए ।