गण्डकीमा कोरोना संक्रमितको संख्या ३ हजार ६ सय ४५ पुगेको छ । पोखरामा थप १६ जनासँगै गण्डकी प्रदेशमा आज ४१ जना थपिएका हुन् । गण्डकी प्रदेश स्वास्थ्य निर्देशनालयले दोस्रो विज्ञप्तिमा कास्कीको पोखरा महानगरका १० जना तथा माछापुच्छ्रे गाउँपालिकाका १ जना सहित गण्डकी प्रदेशमा ३३ कोरोना संक्रमित थपिएको जानकारी दिएको हो ।

संक्रमण पुष्टि हुनेमा पोखराको भाटभटेनीमा कार्यरत पोखरा १७ का २४ वर्षीय पुरुष, पोखरा २७ का ५९ र ६० वर्षीय पुरुष तथा ३० वर्षीया महिला, भारतबाट आएर क्वारेन्टिनमा बसेका पोखरा २९ र ३० का ४९ र २१ वर्षीय पुरुष, पोखरा ३१ का १६ वर्षीय बालक, ४० वर्षीय पुरुष , १३ वर्षीया बालिका , २० वर्षीया महिला र माछापुच्छ्रे गाउँपालिका ६ की २६ वर्षीया महिला रहेका छन् ।

त्यसैगरी गोरखा ४ पालिकाका ७ महिला तथा ५ पुरुष, लमजुङ राईनाशका भारतबाट आएर क्वारेन्टिनमा बसेका २१ बर्षीय पुरुष र नवलपुर गैँडाकोटका ७ वटा वडाका ९ जना पुरुषमा कोरोना देखिएको निर्देशनालयले जनाएको छ ।

यसअघि, बिहानै पोखरामा शुक्रबार थप ६ जनामा कोरोना संक्रमण पुष्टि भएको थियो । गण्डकी प्रदेश स्वास्थ्य निर्देशनालयले कास्कीको पोखरा महानगरका ४ वटा वडाका ५ पुरुष र १ महिला तथा लमजुङका २ पुरुष गरी गण्डकी प्रदेशमा ८ कोरोना संक्रमित थपिएको जानकारी दिएको हो ।

संक्रमण पुष्टि हुनेमा पोखरा ४ का ३२ वर्षीय पुरुष, पोखरा ६ का ४६ वर्षीय पुरुष तथा ४८ वर्षीय पुरुष, पोखरा ८ का १९ र ३९ वर्षीय पुरुष तथा पोखरा १७ का २८ वर्षीय पुरुष रहेका छन् ।

त्यसैगरी लमजुङ सुन्दरबजार ५ का ३० वर्षीय पुरुष तथा पोखरा ७ का २९ वर्षीय पुरुषमा पनि कोरोना पुष्टि भएको छ ।

तनहुँका युवकको कोरोनाबाट मृत्यु

गण्डकी प्रदेशमा कोरोनाबाट मृत्यु हुनेको संख्या ३३ पुगेको छ । तनहुँका एक युवकको कोरोना संक्रमणबाट मृत्यु भएको निर्देशनालयले आज पुष्टि गरेको हो । स्वास्थ्य निर्देशनालय गण्डकीले कोरोनाबाट तनहुँ आबुखैरेनी ३ का ३९ वर्षीय युवकको मृत्यु भएको जनाएको छ । चितवन मेडिकल कलेजमा उपचारत युवकको बिहीबार दिउँसो करिव १ बजे उपचारकै क्रममा मृत्यु भएको निर्देशनालयले जनाएको छ ।

उपचारका लागि भदौ २९ गते अस्पतालमा भर्ना भएका उनमा भदौ ३१ गते कोरोना संक्रमण पुष्टि भएको थियो ।