तनहुँ । तनहुँमा थप ३ जनाको कोरोना संक्रमणबाट मृत्यु भएको छ । जिल्लाको भिमाद-६ का एकै परिवार ३ जनाको मृत्यु भएको स्वास्थ्य निर्देशनालय गण्डकीले जनाएको छ ।

गत असोज १९ गते तनहुँको भिमाद-६ का ७२ वर्षीय पुरुषको कोरोना संक्रमणबाट चितवन मेडिकल कलेजमा मृत्यु भएको हो । त्यस्तै, असोज २४ गते भिमाद-६ का ७५ बर्षीय पुरुष बि. एण्ड बि. अस्पताल काठमाडौँमा मृत्यु भएको निर्देशनालयले जनाएको छ ।

यस्तै, असोज २५ गते भिमाद-६ का ९८ वर्षीय पुरुष मेडिसिटी अस्पताल काठमाडौँमा कोरोना कै कारण मृत्यु भएको हो । ९८ वर्षीय वृद्ध र उनका २ छोराको कोरोनाबाट मृत्यु भएको हो ।

मृत्यु हुने माइला छोरा र साइँला छोरा हुन् । बृद्धका कान्छा छोरामा १७ असोजमा कोरोना पुष्टि भएको थियो । अहिले उनी निको भएर घर फर्किएका छन् ।

संक्रमण पुष्टि भएकी माइलाकी श्रीमती शुक्रराज ट्रपिकल तथा सरुवा रोग अस्पताल टेकुमा उपचाररत छन् । यस्तै, जेठा छोरासमेत कोरोना संक्रमित भएपछि अहिले काठमाडौंकै ह्याम्स अस्पतालमा उपचाररत छन् । जेठा छोराकी बुहारी पनि अहिले कोरोनाका कारण होम आइसोलेसनमै रहेकी छन् ।

योसंगै तनहुँमा कोरोना संक्रमणबाट मृत्यु हुनेको संख्या ८ जना पुगेको छ । गण्डकी प्रदेशमा कोरोनाको संक्रमणबाट मृत्यु हुनेको संख्या ४५ पुगेको निर्देशनालय गण्डकीले जनाएको छ ।