पोखरा – गण्डकीमा कोरोना संक्रमणका मृत्यु हुनेको संख्या ६७ पुगेको छ ।

स्वास्थ्य निर्देशनालयद्वारा सोमबार जारी सातौँ विज्ञप्ति अनुसार तीनजनाको मृत्यु भएको छ भने, आठौँ विज्ञप्तिमा थप १ जनाको मृत्यु भएको निर्देशनालयका निर्देशक डा. विनोद विन्दु शर्माले पुष्टि गरे ।

पोखरा महानगरपालिका वडा नं -१५ निवासी ७८ वर्षीया महिला गत कार्तिक ८ गते कोरोना पुष्टि भइ चरक मेमोरियल अस्पताल भर्ना भएकोमा उपचारका क्रममा ९ गते आइतबार राती ११:०० बजे मृत्यु भएको छ । भने, आठौँ विज्ञप्ति अनुसार पोखरा महानगरपालिका वडा नं -५ निवासी ५५ वर्षीय पुरुषको मृत्यु भएको छ ।न्यूमोनिया र उच्च रक्तचापका बिरामी समेत रहेका उक्त पुरुष गत कार्तिक ६ गते कोरोना पुष्टि भइ स्वास्थ्य विज्ञान प्रतिष्ठानको आइसियुमा उपचारत रहेकोमा ९ गते राती ९:१० बजे मृत्यु भएको हो ।

यस्तै पूर्वी नवलपरासी जिल्लाको गैंडाकोट नगरपालिका -५ का ७३ वर्षीय पुरुषको चितवन मेडिकल कलेजमा उपचारका क्रममा आइतबार मृत्यु भएको छ । स्वास्थ्यमा समस्या आएपछि उक्त पुरुषलाई गत कार्तिक ५ गते अस्पताल भर्ना गरिएकोमा कार्तिक ६ गते  कोरोना पुष्टि भएको थियो ।

यस्तै पूर्वी नवलपरासीकै कावासोती नगरपालिका -२ का ७७ वर्षीय कोरोना संक्रमित पुरुषको सोमबार बिहान २ :३० बजे मध्यविन्दु अस्पतालमा मृत्यु भएको छ । गत कार्तिक ३ गते कोरोना पुष्टि भइ अस्पताल भर्ना भएका उनको उपचारका क्रममा ज्यान गएको अस्पतालले जनाएको छ ।

मृतक सबैको शव व्यवस्थापनको तयारी भैरहेको निर्देशनालयले जानकारी दिएको छ ।