पोखरा – सोमबार पोखराका १७ सहित गण्डकीमा थप २५ जनामा कोरोना पुष्टि भएको छ ।

प्रदेश स्वास्थ्य निर्देशनालयका अनुसार आज गण्डकीका १३९ जनामा गरिएको परीक्षण मध्ये थप २५ जनाको रिपोर्ट कोरोना पोजेटिभ आएको हो ।

आज पुष्टि भएका संक्रमित गण्डकीका ४ जिल्लाका छन् । जसअन्तर्गत कास्कीको पोखरा महानगरका १७, तनहुँका ३, नवलपुरका २ र बाग्लुङ जिल्लाका ३ जनाको रिपोर्ट पोजेटिभ आएको निर्देशनालयले जनाएको छ ।आज थपिएका संगै गण्डकीमा कोरोना संक्रमितको कूल संख्या १५ हजार १ सय ८९ पुगेको छ । जसमा ४६६ जना सक्रिय संक्रमित छन् ।

पछिल्लो २४ घन्टामा गण्डकीबाट १०२ जना कोरोनामुक्त भएका छन् । यो संगै, प्रदेशमा कोरोनामुक्त हुनेको संख्या १४ हजार ५ सय २४ पुगेको छ ।

सोमबार गण्डकीमा थप दुई जनाको कोरोना संक्रमणका कारण मृत्यु पुष्टि भएको छ ।

पोखरा महानगरपालिका -८ निवासी ७३ वर्षीय कोरोना संक्रमित पुरुष र तनहुँ जिल्ला भिमाद नगरपालिका -६ का ५० वर्षीय कोरोना संक्रमित महिलाको मृत्यु पुष्टि भएको निर्देशनालयले जनाएको छ । यो संगै, गण्डकीमा कोरोना संक्रमणका कारण मृत्यु हुनेको संख्या १९९ पुगेको छ ।