पोखरा – कोरोना जोखिम भत्ता नपाएको भन्दै पोखरा -१६ बाटुलेचौरस्थित मातृशिशु मितेरी अस्पतालका चिकित्सक र कर्मचारी आन्दोलित भएका छन् ।

कोरोना माहामारीमा अग्रपंक्तिमा रहेर स्वास्थ्य सेवामा खटिएका स्वास्थ्यकर्मीले कोरोना जोखिम भत्ता नपाएपछि अस्पतालका झन्डै ८० जना बढी स्वास्थ्यकर्मी र कर्मचारी आन्दोलित भएका हुन् ।

अस्पतालका सुचना अधिकृत लक्ष्मण पौडेलका अनुसार अस्पतालले दिने सेवामा कुनै अवरोध नहोस भनेर आइतबारदेखि दैनिक आधा घण्टा अस्पताल परिसरमा ध्यानाकर्षण स्वरूप नारावाजी गरिएकोमा बुधबारदेखि पनि सम्बन्धित निकायले सुनुवाइ नगरेमा थप आन्दोलनका कार्यक्रमबारे छलफल गरिने जानकारी दिए ।

गण्डक न्युजसंग संक्षिप्त कुरा गर्दै पौडेलले भने, ” हामीले महामारीको समयमा पनि आफ्नै स्टाफसमेत सक्रिय रुपमा कोरोना संक्रमित भएको अवस्थामा विरामीलाई सेवा दियौं, हाम्रो माग निर्देशिका अनुसार दिने भनिएको कोरोना जोखिम भत्ता दिईयोस् ।”

आन्दोलित चिकित्सक तथा कर्मचारीले अस्पताल परिसरमा कोरोना जोखिम भत्ता पाउनैपर्छ, भेदभावपूर्ण व्यवहारको अन्त्य गर, हाम्रो माग पूरा गर, लगायतका नारा लगाएका थिए ।