गण्डकी प्रदेशका मुख्यमन्त्री पृथ्वीसुब्बा गुरुङ बिरामी परेका छन् । उनको र्यापिड डाइगोनिस्टक टेस्ट (आरडीटी) रिपोर्ट पोजिटिभ आएको बताइन्छ । काठमाण्डौबाट फर्केपछि सामान्य टाउको दुखाई पछि ननिको महसुस गरेका उनले आरडीटी परीक्षण गराएका थिए । मंगलबार नै पीसीआर टेस्टका लागि स्वाब समेत दिएका छन् । रिपोर्ट आज आउँदैछ ।

विशेष अधिवेशनमा उठेका माग बमोजिम प्रदेशसभा सदस्यको पीसीआर टेस्ट गराउँदा ३ जना सांसदहरु एमालेका राजीव पहारी, प्रभा कोइराला र काँग्रेसकी मनकुमारी गुरुङलाई कोरोना पुष्टि भइसकेको छ । विशेष अधिवेशनमा अनुपस्थित जनमोर्चाका खिमविक्रम शाहीको पहिले नेगेटिभ र त्यसपछि २ पटकको पोजिटिभ भनिएकोमा उनी अहिले हस्पिटल छाडेर होटलमै छन् । मुख्यमन्त्री सचिवालयका केही कर्मचारीमा पनि कोरोना पुष्टि भइसकेको छ ।

मुख्यमन्त्रीका प्रेस संयोजक विक्रम न्यौपानेमा पनि संक्रमण देखिएर ३ दिनदेखि होम आइसोलेसनमा बसेका छन् । न्यौपानेकै कन्ट्याक्ट ट्रेसिङमा मुख्यमन्त्री परेका थिए ।

मुख्यमन्त्री गुरुङ मंगलबार सर्वदलीय बैठकमा पनि सहभागी थिए । उनी नजिकै सभामुख नेत्रनाथ अधिकारी थिए भने अन्य चार दलका नेताहरु पनि एउकै कोठामा थिए ।

बैठकमा मुख्यमन्त्रीले कोरोनाको सन्त्रास बढिरहेको र प्रशासनले समेत निषेधाज्ञा जारी गरिरहेको सन्दर्भमा निषेधाज्ञा सकिएपछि कार्यव्यवस्थाको बैठक राखेर संसद डाकिनुपर्ने प्रस्ताव राखेका थिए । मुख्यमन्त्री अस्वस्थ भएसँगै प्रदेश सभामा अड्किएको अविश्वासको प्रस्ताव के हुने ? भन्ने अन्योल बढेको छ ।