पोखरा । शनिबार गण्डकीमा थप ५४३ जनामा कोरोना पुष्टि भएको छ।

प्रदेश स्वास्थ्य निर्देशनालयको दैनिक कोरोना सम्बन्धी विज्ञप्ति अनुसार पछिल्लो २४ घण्टामा गण्डकीका १ हजार ८०२ जनामा गरिएको नमुना परीक्षणमा ५४३ जनाको रिपोर्ट कोरोना पोजेटिभ आएको हो ।

आज संक्रमण पुष्टि हुनेमा प्रदेशका दश जिल्लाका छन् । जसअन्तर्गत कास्कीका १०५ जना, तनहुँका १०० जना, गोरखाका ५८ जना, लमजुङका ६४ जना, नवलपुरका ९२ जना र स्याङ्गजाका ६१ जनामा कोरोना पुष्टि भएको छ।

यस्तै, पर्वतका आठ जना, बाग्लुङका सात जना, म्याग्दीका ४० जना मुस्ताङ जिल्लाका आठ जनाको परीक्षण रिपोर्ट कोरोना पोजेटिभ आएको जारी विज्ञप्तिमा जनाइएको छ ।

आज थपिएकासंगै गण्डकीमा कोरोना संक्रमितको कूल संख्या ४९ हजार ९५७ पुगेको छ ।

पछिल्लो २४ घण्टामा गण्डकीबाट ८३८ जना कोरोनामुक्त भएका छन् । योसंगै, प्रदेशमा कोरोना मुक्त हुनेको संख्या ४३ हजार १४६ पुगेको छ ।

शनिबार पनि गण्डकीमा आठ जनाको मृत्यु पुष्टि भएको छ । आज मृत्यु पुष्टि हुनेमा पोखरामा उपचाररत छ जना, गोरखाका एक जना र नवलपुरका एक जना छन्।

आज मृत्यु पुष्टि भएकासंगै गण्डकीमा कोरोना संक्रमणका कारण ज्यान गुमाउनेको संख्या ८३१ पुगेको निर्देशनालयले जनाएको छ ।