पोखराको बाटुलेचौरबाट मंगलबार साँझ ५ बजेदेखि सम्पर्कविहीन भएकी समृद्धि राई धम्पुसमा फेला परेकी छन् । चौबिस घण्टा नबित्दै प्रहरीले १५ वर्षीया किशोरीलाई फेला पारी आफन्तको जिम्मा लगाएको छ ।

कास्की प्रहरीका अनुसार धम्पुस स्थित प्रहरी कार्यालयले समृद्धिकी आमालाई केहि बेर अघि मात्रै जिम्मा लगाएको हो । चितवन, नवलपरासी लगायत जिल्लाहरुमा किशोरीहरु हराएका तथा मृत भेटिएका घटना सार्वजनिक भइरहँदा पोखरामा बालिका हराएपछि परिवार आत्तिएका थिए ।

उनीहरुले एक दिन नबित्दै प्रहरीमा खोजतलासका लागि निवेदन दिए । त्यसपछि प्रहरीले खोजीमा तीब्रता दिएको थियो । साथै, सामाजिक सञ्जालहरुमा पनि खोजीका लागि आग्रह भएपछि पोष्ट भाइरल बन्यो ।

यसरी भेटिइन् समृद्धि

मंगलबार साँझ ५ बजेतिर उनी घरबाट निस्केको परिवारले जानकारी दिएको छ । लामाचौरतर्फ हिँड्दै गएको देखेको प्रत्यक्षदर्शीलाई उदृत गर्दै प्रहरीले जनाएको छ । उनले मोबाइल बोक्ने गरेकी थिइनन् ।

त्यसपछि ट्याक्सीमा समृद्धि र उनका निकट साथी ट्याक्सी चढेर गएको खुलेपछि प्रहरीले ट्याक्सीको खोजतलास सुरु गरेको प्रहरी श्रोतले जनाएको छ । ट्याक्सी चालक नियन्त्रणमा लिएपछि उनले धम्पुसमा लगेर छाडेको बताए ।

धम्पुस प्रहरीले त्यहाँका सबै होटल तथा होम स्टे छापा मार्दा एक होटलमा बसेको अवस्थामा भेटिएको थियो । सोहि समय १७–१८ वर्षका एक व्यक्ति हराएको भन्दै परिवारले खोजतलासका लागि प्रहरीमा रिपोर्ट गरेको कास्की प्रहरीले जनाएको छ । यसकै आधारमा पनि खोजतलासमा सहजता भएको हो ।

१५ वर्षकी बालिका एक्कासी वेपत्ता भएका कारण पनि तदारुकता साथ खोजबिनमा लागेको प्रहरीले चौबिस घण्टामै ठाउँ पत्ता लगाएको हो ।

• अद्यावधिक गरिएको ।