फेवातालको मुख्य मुहान खोला हर्पनखोलाले बगाएर ल्याउने ढुंगा र गेग्य्रान रोक्न भन्दै बनाइएको सिल्ट्रेसन ड्याम दुई वर्ष नपुग्दै बाढीले बगाइदियो । पोखरा २३ स्थित हर्पनखोलामा झण्डै ८ करोडमा बनेको ड्याम यति चाँडै बगेपछि यतिबेला पोखरा महानगर र निर्माण कम्पनीको चर्को आलोचना भइरहेको छ ।

यो ड्याम निर्माण सुरु गरेदेखि नै विवादित बनेको थियो । प्रदेश सांसद राजिव पहारीसहितको टोलीले अनुगमन गर्दा हातले छुँदा समेत भत्किएपछि प्रदेशसभामा यो विषयले प्रवेश पाएको थियो । स्थानियले पनि बस्ती जोखिममा पर्ने भन्दै विरोध सुरु गरेका थिए । अहिले आधा दर्जन घरमा क्षति पनि पुगिसकेको छ ।

यसैबीच, सार्वजनिक सरोकारको यो विषयलाई लिएर भ्रष्टाचार विरुद्धको नागरिक निगरानी संस्था (सिटिजन्स जुरी फर करप्शन कन्ट्रोल) ले अख्तियार दुरुपयोग अनुसन्धान आयोगको कार्यालय, पोखरामा उजुरी दिएको छ ।

हर्पनखोला सिल्टेशन ड्यामको अनियमितता सम्बन्धमा छिटो छरितो प्रक्रियाद्वारा छानविन गरिदिन संस्थाले उजुरी दिएको हो ।

‘चौतर्फी कमिसन र मिलेमतोको कारण व्यापक नैराश्यता छाइरहेको बेला फेवातालसँग जोडिएको सार्वजनिक चासो र महत्वको विषयलाई गम्भीरतापूर्वक लिई छिटो छरितो प्रक्रियाद्वारा अनुसन्धान गरी भ्रष्टाचारजन्य दण्डहीनता अन्त्यका लागि विशेष पहल गरिदिनुहुन सविनय अनुरोध गर्दछौं,’ संस्थाका सचिव रामबहादुर पौडेलद्वारा प्रेषित उजुरीमा उल्लेख छ ।