पूर्वमन्त्री समेत रहेका नेकपा एमालेका सांसद रामशरण बस्नेतले गण्डकी प्रदेशसभा बैठकमा आफूले टेबल पछारेको नभई ठाउँ साँघुरो भएर माथि सारेको प्रष्टीकरण दिएका छन् ।

बजेट पास गर्ने कार्यसूचि रहेको प्रदेशसभाको बुधबार बसेको बैठकलाई अवरोध गर्दै एमाले सांसदहरुले कुनै हालतमा सदन चालू हुन नदिने मनसायका साथ नाराबाजी गरिरहेका थिए । सोहि क्रममा मर्यादापालकसँग ठेलमठेल भएपछि बस्नेतले टेबल उचालेर फालेका थिए ।

कोरोना महामारीका कारण भौतिक दुरी कायम गर्नुपर्ने भएकाले अहिले पोखराको सभागृहमा प्रदेशसभा सञ्चालन हुँदै आएको छ । त्यसैले त्यहाँको भौतिक सामाग्रीहरु अस्थायी रुपमा जडान भएका छन् ।

घटनापछि एमाले संसदीय दलले आयोजना गरेको पत्रकार सम्मेलनमा सांसद बस्नेतले साँघुरो भएर आफूले टेबल सारेको दाबी गरेका हुन् । उनले भने – ‘साँघुरो भएर सारेको हो, हान्न खोजेको होइन । तपाईं पत्रकारहरु जुनै पार्टी समर्थित हुनुहोला, बुझेर लेख्नुहोला ।’

उनले सत्तारुढ सांसदहरुले आफूहरुमाथि आक्रमणको प्रयास गरेको दाबी समेत गरे । एमाले एक्लैको २७ सांसद रहेको भन्दै उनले ४ वटा पार्टीको सत्तापक्ष र आफ्नो दलबीच जम्मा चार सिट मात्र फरक रहेको बताए । उनले भने, ‘सरकार तानाशाही रुपमा अगाडि बढेको छ, यसको नेकपा एमालेले प्रतिवाद गर्छ ।’

सांसद बस्नेतले सभामुख अधिकारीले गैरसंसदीय चरित्र देखाएको आरोप लगाए । उनले समन्वयको भूमिका पनि नखेलेको बताए । आज मात्रै एमालेले ४ चोटी बैठक अवरोध गरेको थियो ।

एमाले संसदीय दलका प्रमुख सचेतक मायानाथ अधिकारीले एमालेले शक्ति नदेखाएको बताए । उनले एक्लै २७ जना रहेको एमालेले साँच्चै टेबुल फाल्ने, हुलहुज्जत गर्ने हो भने सक्ने तर त्यस्ता कार्य एमालेले नगर्ने बताए ।