पोखरा । बुधबार बेलुकादेखि परेको अविरल वर्षाले कास्कीका विभिन्न स्थानमा जनधनको क्षति गरेको छ । भलाममा वितण्डा मच्चायो । विहीबार पनि अपरान्हदेखि नै अविरल वर्षा भइरहेको छ ।

पोखरा महानगरपालिका वडा नं. १३ को आर्वामा पनि क्षति पुगेको स्थानिय सागर बरालले जानकारी दिए । निर्माणाधीन बनबाटिका एड्भेञ्चर रिसोर्टमा काम गरिरहेका ८ जना मजदुरहरु मुस्किलले बचेका छन् । राति उनीहरु सुतेकै ठाउँ नजिकै पहिरो गएको थियो ।

स्थायिन युवा व्यवसायी सुनिल सापकोटा र सानु भुजेलले ३ करोड बढी लगानीमा रिसोर्टसहित ग्रीन जोन एग्रो फार्मको योजनामा छन् । रिसोर्टको भौतिक पूर्वाधारको काम भइरहेको छ । फार्ममा कालिज र कुखुरा पालन सुरु भइसकेको छ ।

फार्ममा पहिलो चरणमा ३ सय कालिज थिए । माथिबाट आएको पहिरोले फार्म बगाउँदा कालिज नष्ट भएको छ । भैंसीका लागि तयार पारिएको ३ वटा गोठमध्ये २ वटा पूर्ण रुपमा बगाएको छ । एउटा गोठमा आंशिक क्षति पुगेको सञ्चालक सापकोटाले गण्डकन्यूजलाई जानकारी दिए । यस्तै, लोकल कुखुरा ५ दर्जनजति पालिएकोमा पहिरोले पूर्ण क्षति पुगेको छ ।

रिसोर्टका निर्माण सामाग्रीहरु सहित ४० लाख जति क्षति भएको सापकोटाले बताए । ‘ रिसोर्टमा चाहिँ क्षति पुगिसकेको छैन । फार्ममा क्षति पुगेको हो । रिसोर्टको संरचना निर्माणका लागि आवश्यक सामाग्रीहरु सबै पहिरोले लग्यो ।’ – सापकोटाले भने । फार्ममा कालिज, भैंसी, कुखुरा, बाख्रा पालन गरिने योजनामा सञ्चालकहरु छन् । रिसोर्टसहित जिप साइकल, रोप साइकलको एडभेञ्चर गेमहरु पनि सञ्चालन गरिने योजना छ ।

रिसोर्ट सात-आठ महिनाअघिबाट निर्माण गर्न सुरु भएको हो । रेष्टुरेन्ट तयार भइसकेको छ भने एग्रोको काम पनि ५० प्रतिशत पूरा भइसकेको सापकोटाले बताए ।

यही पहिरोले सापकोटाको फार्म सहित तल बामदेव बरालको कुखुरा फार्ममा पनि क्षति पुगेको छ । यसअघि वर्षाले काहुँखोला-बिजयपुर सडक खण्डमा पर्ने दाद्रोमा ठूलो पहिरो गएर आर्वा जाने बाटो नै अवरुद्ध भएको थियो ।

तस्वीर/भिडियोः सागर बराल