पोखरा महानगरपालिका वडा नं. ११ का वडा अध्यक्ष मोहन प्रसाद बास्तोलाले नेपाली काँग्रेस पार्टीको पोखरा महानगर कमिटि हाँक्न अघि बढेका छन् । नेपाली कांग्रेसको १४ औँ महाधिवेशनमा पोखरा महानगरपालिकाको नगर सभापतिमा उनले उम्मेदवारी घोषणा गरेका हुन् ।

काँग्रेसको तर्फबाट पोखरा महानगरपालिका वडा नं. ११ को नेतृत्व सम्हाल्दै आएका बास्तोलाले काँग्रेसलाई आउँदो स्थानिय चुनावमा पोखराको १ नं। पार्टीको रुपमा स्थापित गर्ने रणनीतिका साथ उम्मेद्वारी घोषणा गरेको पत्रकार सम्मेलनमार्फत जानकारी दिए ।

स्थानिय जनप्रतिनिधिका रुपमा पोखरा महानगरपालिकामा आइसकेपछि पोखरा महानगरपालिकाको विकास समिति संयोजक र वातावरण तथा विपद् व्यवस्थापन समितिको सभापतिको रुपमा ४ वर्ष काम गर्दा आफुले ३३ वटै वडामा पार्क निमार्ण, मठ मन्दिर तथा किरियापुत्री भवन निमार्ण तथा संरक्षणलाई जोड दिएको उनले बताए ।

महानगरपालिका भित्रको अनेकौं बेथितिहरुलाई चिर्न पनि काँग्रेस आगामी चुनावमा पहिलो पार्टी भएर आउनै पर्ने उनले बताए । आफू कुनै पनि गुट उपगुटमा रहेर नभई स्वतन्त्र रुपमा उम्मेद्वारी घोषणा गरेको पनि बास्तोलाले बताए ।