मिलेनियम च्यालेन्ज कर्पोेरेशन (एमसीसी) विरुद्ध पोखरामा विरोध प्रदर्शन गरिएको छ । स्वतन्त्र पोखरेली जनताको ब्यानरमा भएको प्रदर्शनमा सहभागीहरुले एमसीसीविरुद्ध विभिन्न नारा लेखिएका प्लेकार्ड हातमा लिएर मौन धर्ना दिए ।

शुक्रबार अपरान्ह मानवअधिकार चोकमा भएको विरोध प्रदर्शनमा सहभागीले ‘एमसीसीको नाममा अमेरिकी साम्राज्यवादको रणनीतिक स्वार्थ बढ्ने भएपछि त्यसको विरोध गरिएको’ बताए।

हिन्दप्रशान्त रणनीति (आइपीएस) अमेरिकीको सामरिक योजना भएकाले त्यसअन्तर्गतको एमसीसी विशुद्ध आर्थिक परियोजना नभएको टिप्पणी गर्दै उनीहरुले देशमा राष्ट्रघाती सन्धि सम्झौता हुँदा कोहि पनि चुप लागेर बस्न नहुने बताए ।

सरकारले एमसीसी अघि बढाउन खोज्दा गत साताबाटै पोखरामा विरोध प्रदर्शन गरिएको छ । संयुक्त देशभक्त मोर्चाको ब्यानरमा राष्ट्रिय सम्पदा तथा जनअधिकार संरक्षण समिति नेपाल, सिटीजन जुरी कास्की, नागरिक समाज कास्की लगायतका संघसंस्थाको आयोजनामा प्रदर्शन भएका छन् । गत वर्ष पनि दबाबमुलक कार्यक्रम गरिएकाे थियाे ।

अहिले युवाहरु अग्रसर भएर स्वतन्त्र पोखरेली जनताको ब्यानरमा खबरदारी गरिएको हो । सहभागी युवा अशोक खड्काले राष्ट्रहितविपरीत एमसीसी संसदबाट पारित गरिने प्रपञ्च रचिएकोले त्यसलाई रोक्न धर्नामा बसेका बताए ।