पोखरा । देशको सबैभन्दा ठूलो पार्टी नेकपा (एमाले) निकट विद्यार्थीहरुको संगठन अखिल नेपाल स्वतन्त्र विद्यार्थी युनियन (अनेरास्ववियु) गण्डकी प्रदेश कमिटिको पूर्ण बैठकले विभिन्न ११ वटा निर्णय गरेको छ ।

सबै विद्यार्थीहरुको शिक्षा र स्वास्थ्य पूर्ण रुपमा राज्यको जिम्मेवारीमा ल्याउन शिक्षा र स्वास्थ्य बीमाका लागि सम्बन्धित सरोकारवालाको ध्यानाकर्षण गराउने यो कमिटिको पहिलो निर्णय हो । यस्तै, विपत्तिमा सहारा, सबै खाले विभेदमा विद्रोह, विकृति, विसंगतिका विरुद्धमा म अखिल कार्यक्रम सबै जिल्लामा स्वयंसेवी अभियानका रुपमा सञ्चालन गर्ने निर्णय पनि बैठकले गरेको छ ।

अनेरास्ववियू गण्डकीले विद्यार्थीहरुलाई पूर्ण खोपको व्यवस्था गर्न ध्यानाकर्षण गराउनुका साथै रचनात्मक कार्यहरुमा जोड दिएको छ । शिक्षा, स्वास्थ्य क्षेत्रमा देखिएको विकृति विसंगति विरुद्धको अभियानलाई पनि प्राथमिकता दिइएको छ ।

प्रदेश कमिटिका संयोजक प्रकाश पौडेलको अध्यक्षतामा बसेको बैठकको निर्णयहरु निम्नानुसार छन् ।

बैठकको प्रमुख अतिथिमा एमाले केन्द्रिय कमिटि सदस्य एवं सांसद खगराज अधिकारीका साथै संगठनका केन्द्रिय अध्यक्ष सुनिता बराल, निवर्तमान उपाध्यक्ष रश्मी आचार्य, पूर्व अध्यक्ष किशोर विक्रम मल्लको विशेष आतिथ्यता रहेको थियो । नेताहरुले संगठनले गर्नुपर्ने दायित्वका बारेमा स्मरण गराउँदै अनेरास्ववियुको विरासतका बारेमा प्रकाश पारेका थिए । बैठकमा केन्द्रिय कमिटि सचिव जुन तामाङ, प्रदेश इञ्चार्ज एवं सचिव सुजन भट्टराई, सचिव खेम मरासिनी, स्थायी कमिटि सदस्य अर्जुन अधिकारी लगायतको उपस्थिति रहेको थियो ।

बैठकपछि अनेरास्ववियु गण्डकीले एक प्रेस विज्ञप्ति जारी गर्दै विद्यार्थीहरुलाई अनेरास्ववियुमा आबद्ध हुन अपिल पनि गरेको छ । सरकारलाई जनताको जनजीवीकाको पक्षमा लाग्न ध्यानाकर्षण गराउँदै मानव विरोधी क्रियाकलाप विरुद्ध भण्डाफोरको आह्वान पनि गरेको छ ।