भौतिक पूर्वाधार तथा यातायात मन्त्री रेणु यादवलाई तत्काल बर्खास्त गर्न जनमत पार्टीले माग गरेको छ ।

मन्त्री यादवले दिएको अभिव्यक्ति बारे डा. सिके राउत नेतृत्वको जनमत पार्टीले नरसंहार गराई दिने जस्ता अपराधिक अभिव्यक्ति दिने मन्त्रीलाई तत्काल बरखास्त गर्न माग गरेको हो ।

सो पार्टीका उपाध्यक्ष दिपक कुमार साहले बिहीबार राति प्रेस विज्ञप्ति जारी गर्दै चरम आपराधिक अभिव्यक्ति दिने मन्त्री यादवलाई बर्खास्त गरेर २०६४ सालको गौर नरसंहारमा संलग्नहरुलाई तत्काल पक्राउ गर्न माग गरेका हुन् ।

अपराधिक अभिव्यक्ति दिने, हत्या हिंसा भड्काउन खोज्ने र अर्को नरसंहारको षडयन्त्र रच्ने मन्त्रीलाई अविलम्ब बर्खास्त गरेर सरकारले कारबाही गर्नुपर्छ, विज्ञप्तिमा भनिएको छ ।

गौर घटनाका अभियुक्तहरुलाई सुरक्षाकर्मीले विशिष्ठ सुरक्षा घेरामा राखेको भन्दै सो पार्टीले उनीहरुलाई तत्काल पक्राउ गरी कारबाही गर्न र पीडितहरुलाई न्याय दिए मात्रै मधेशमा आपराधिक राज समाप्त हुने बताएको छ ।

सीके राउत नेतृत्वको जनमत पार्टीका कार्यकर्ताले आफूलाई कालो झण्डा देखाएको भन्दै मन्त्री यादवले गौरमा आयोजित कार्यक्रममा अर्को गौर नरसंहार गराउने धम्की दिएकी थिइन् ।