मोरङको धनपालथान गाउँपालिका–७ को उखुबारीमा गाडिएका अवस्थामा भेटिएका दुवै शवको पहिचान खुलेको छ । उनीहरु दुई व्यक्ति एक अर्काको साथी रहेको खुलेको छ ।

उखुबारीमा गाडेको अवस्थामा प्रहरीले बुधबार राति एउटा र बिहीबार दिउँसो एउटा शव उत्खनन गरेको थियो । बिहीबार खाल्डोबाट निकालिएको शवको साथमा भेटिएको कागजातका आधारमा धरान उपमहानगरपालिका–३ घर भई भक्तपुर बस्दै आएका ४९ वर्षीय राजेन्द्रकुमार श्रेष्ठको पहिचान खुलेको थियो । श्रेष्ठको पोष्टमार्टमपछि आफन्तले शुक्रबार नै सदगद गरेका थिए ।

तर अर्को एउटा शवको सनाखत भएको थिएन । अनुसन्धानको क्रममा अर्को शव सप्तरीको शम्भुनाथ नगरपालिका–४ घर भई काठमाडौँ बस्ने शम्भु चौधरीको रहेको खुलेको प्रहरीले जनाएको छ । चौधरीको शव उनका आफन्तले सनाखत गरेको प्रहरीले जनाएको छ । मृतकको शारिरीक बनावट र घटनास्थलमा भेटिएको कपडाका आधारमा आफन्तले शवको पहिचान गरेका हुन् ।

प्रहरीका अनुसार उनीहरु दुबै एकै समयमा सम्पर्कविहीन थिए । श्रेष्ठको सम्पर्कका आधारमा प्रहरी शम्भुको परिवारसम्म पुगेको थियो ।

उनीहरु दुवैजना जग्गा कारोबारमा संलग्न रहेको खुल्न आएको छ । उनीहरु दुवै जना गत मंसिर पहिलो साता काठमाडौँबाट पूर्वतर्फ लागेको बताइएको छ । कुनै लेनदेनमा विवाद भएर उनीहरुको एकैसाथ हत्या भएको हुनसक्ने प्रहरीको प्रारम्भिक अनुमान छ । थप तथ्य अनुसन्धानबाट खुल्ने प्रहरीले जनाएको छ ।