काठमाडौं। प्रहरी प्रधान कार्यालय केन्द्रीय अनुसन्धान ब्युरोबाट खटिएको प्रहरीको टोलीले  बैंकिङ कसूर मुद्दाका दुई जना फरार प्रतिवादीहरू लाई पक्राउ गरेको छ।

पक्राउ पर्नेमा तनहुँ जिल्ला ब्यास नगरपालिका वडा नं -९ स्थायी घर भइ हाल काठमाडौं महानगरपालिका -२६ सोह्रखुट्टे बस्ने एम.एम कन्स्ट्रक्सन प्रालिका संचालक ३२ वर्षीय सुरज गुरुङ र सिन्धुपाल्चोक घर भई काठमाडौं महानगरपालिका-३१ तीनकुने बस्ने ३६ वर्षीय सुमित भण्डारी रहेका छन् । फरार रहेका उनीहरु मध्ये सुरजलाई उच्च अदालत पाटनको गत मंसिर २४ गतेको फैसलाले २४ दिन कैद र ७२ लाख रुपैयाँ जरिवाना ठहर गरेको थियो भने, सुमितलाई २०७७ मंसिर १३ गतेको फैसलाले ५ दिन कैद र ९ लाख ७३ हजार रुपैयाँ जरिवाना ठहर गरेको थियो ।

प्रहरीले सुरजलाई आइतबार काठमाडौं गोंगबुबाट र सुमितलाई सोमबार लाजिम्पाटबाट पक्राउ गरेको हो । उनीहरूले आफ्नो खातामा पर्याप्त मौज्दात रकम नहुँदा नहुँदै पीडितहरूलाई झुक्याएर आ-आफ्नो बैंक खाताबाट भुक्तान हुने भनी चेक दिएको ठहर गरी उच्च अदालत पाटनले उक्त फैसला गरेको थियो ।

फैसला कार्यान्वयनका लागि सुरजलाई जिल्ला अदालत ललितपुर र सुमितलाई जिल्ला अदालत भक्तपुरमा पेश गरिएको उक्त ब्यूरोले जनाएको छ ।