पोखरा । प्रा.डा. अभि सुवेदीले आफ्ना विद्यार्थी राज्यका उच्च तहमा पुगेपनि अपेक्षा अनुसार काम नगर्दा चित्त दुख्ने गरेको बताएका छन् । पोखराको प्रतिभा माविद्वारा नगद १ लाखसहित ‘प्रतिभा विशेष व्यक्तित्व सम्मानबाट सम्मानित भएपछि डा. सुवेदीले शिक्षण पेशामा रहँदा खुशी पनि मिलेको र चित्त पनि दुखेको सुनाए ।

‘शिक्षक नदी किनारको माझी जस्तै हुन् । तर्छन्, जान्छन्, माझी उहीँ रहन्छन् । शिक्षा र समय नदी हो, बगिरहन्छ । मेरो जिन्दगीभरको काममा खुशी छु, गर्व पनि छ । र, चित्त दुखेको पनि छ ।’ उनले भने– ‘मैले पढाएका विद्यार्थीहरु सबै पदमा पुगे । देशका प्रधानमन्त्री पनि भए, शिक्षा मन्त्री, विदेश मन्त्रीहरु भए । चित्त दुखेको यहाँ हो । मैले जे अपेक्षा गरेँ । त्यो भएन ।’

विगत ५३ वर्षदेखि विद्यार्थीहरुलाई अगाडि राखेर मुख हेर्दै आएको बताउँदै उनले ७५ वर्षको यो उमेरमासमेत पढाइरहेको बताए । प्रा.डा. सुवेदीले भने– ‘अगाडि विद्यार्थी राखेर उनीहरूका मुख हेरेको ५३ वर्ष भएछ । यत्ति हो, अहिले जुम प्रविधिबाट हेरिरहेको छु । अहिले पनि विद्यार्थीकै अगाडि छु । २०६५ मा आएपछि अहिले दोस्रोपटक पोखराको प्रतिभाको आँगनमा टेकेँ । टिनको छानो थियो, भव्य भइसकेछ । विद्यालयको प्रगति देख्दा खुशी छु ।’

ठट्यौली पारामा डा. सुवेदीले विद्यार्थीमाझ भने– ‘मेरा विद्यार्थीहरू बुढा भए । म मात्रै उस्तै छु । १० वर्षअघि ६५ औं जन्मदिन मनाए । त्यसपछि हरेक वर्ष ६५ औं वर्षदिन मनाइरहेको छु ।’

उनले पोखरा सिर्जनशील व्यक्तिहरुको शहर रहेको पनि बताए । ‘पोखरामा सिर्जनशील व्यक्तिहरूको जमघट राम्रो छ । धन सिर्जनशील काममा लगाउँछन् । संस्था बनाउँ भन्ने धारणा छ । यो संस्था उदाहरण हो । पोखरामा धेरै सम्भावना छ ।’ उनले भने – ‘पढाई र सिर्जनशीलतामा भिन्नता छैन । कोहि पढ्छन्, कोहि नाच्छन्, गाउँछन्, खेल्छन् । सबैसँग आफ्ना प्रतिभा हुन्छन् । यसैमा केन्द्रीत रहँदै अघि बढ्नुपर्छ ।’ उनले सम्मान थाप्ने बानी आफ्नो नरहेको भन्दै आजको दिन लाज हुने गरी प्रशंसा पाएको दिनका रुपमा चित्रित गरे ।

कार्यक्रममा डा. सुवेदीसँगै नेपाली राष्ट्रिय क्रिकेट टोलीका पूर्व कप्तान ज्ञानेन्द्र मल्ललाई ‘प्रतिभा वर्ष सम्मान– २०७८’ बाट सम्मान गरिएको छ ।

विद्यालय व्यवस्थापन समितिका अध्यक्ष नारायणप्रसाद पौडेल, विद्यालयका प्रबन्ध निर्देशक बलबहादुर थापा, सञ्चालक डा. राजेन्द्र चापागाईं, विद्यालयका प्राचार्य विश्वगोपाल पराजुली, निर्देशक किरण सापकोटालगायतले प्रा.डा.सुवेदी र क्रिकेटर मल्ललाई जनही एक लाखसहित ताम्रपत्र, खादा, माला र अवीर लगाएर सम्मान गरे ।

प्रा.डा. सुवेदीले झण्डै ६० वर्षदेखि कला र साहित्य तथा शैक्षिक क्षेत्रमा पु¥याएको योगदानको कदर स्वरुप सम्मान गरिएको विद्यालयले जनाएको छ । नेपाली तथा अङ्ग्रेजी भाषामा कविता रचना, साहित्य समीक्षा र नाटक लेखन गर्दै आएका छन् । विगत ५३ वर्षदेखि उच्च शिक्षा क्षेत्रमा प्राध्यापनरतसमेत छन् ।

क्रिकेट खेलमा पु¥याएको विशिष्ट योगदानको कदर स्वरुप मल्ललाई सम्मान गरिएको विद्यालयले जनाएको छ । यसअघि, युवा क्रिकेटर सन्दीप लामिछाने, राष्ट्रिय भलिबलकी कप्तान अरुणा शाहीलाई खेल क्षेत्रमा पु¥याएको योगदानको कदर गरी जनही १ लाख राशीसहित सम्मान गरिसकिएको छ । एचआइभी संक्रमित भएर पनि सबैको प्रेरणाका श्रोत बनेका सगरमाथा आरोही गोपाल श्रेष्ठलाई पनि विद्यालयले सम्मान गरिसकेको छ।

विद्यालयले सोहि विद्यालयकी छात्रा सीमा केसीलाई पनि सम्मान गरेको छ । ‘वल्र्ड इकोनोमिक कप’ मा रजत पदक जितेकी उनलाई विद्यालयले ‘प्रतिभा रत्न सम्मान–२०७८’ बाट सम्मान गरेको हो । यस्तै, नेशनल ईकोनोमिक्स ओलम्पियाडमा गण्डकी प्रदेशबाट छनौट हुन सफल कुमार बराललाई पनि सम्मान गरेको छ ।

‘प्रतिभा व्यक्तित्व सम्मान’बाट प्रा.डा. सुवेदी र ‘प्रतिभा वर्ष सम्मान’बाट क्रिकेटर मल्ल सम्मानित