पोखरा महानगरपालिका वडा नम्बर ८ को अध्यक्षमा नेकपा एमालेका उम्मेदवार रुद्रनाथ बराल प्यानल सहित विजयी भएका छन् । बराल यस अगाडि पनि सोही वडाको वडाध्यक्ष थिए । उनले २ हजार एक सय ४० मत प्राप्त गरे । बरालको निकटतम प्रतिद्वन्द्वी रहेकी नेपाली कांग्रेसकी शारदा गिरीले १ हजार ५ सय २५ मत मात्र प्राप्त गरिन् ।

बराल र गिरी दुबै २०७४ को निर्वाचनमा पनि वडाध्यक्ष पदमा प्रतिस्पर्धा गरेका थिए, त्यस बेला पनि बरालले गिरीलाई पराजित गरेका थिए ।वडाबाट नेकपा एमालेको तर्फबाट मेयर पदका उम्मेदवार कृष्ण थापालाई १ हजार ६३९ मत र उपमेयरका उम्मेदवार मन्जुदेवी गुरुङलाई १ हजार ९ सय ७५ मत परेको छ ।

त्यस वडामा वडाध्यक्षका उम्मेदवार बराललाई भने मेयर थापाको भन्दा ५०१ मत बढ़ी तथा उपमेयर गुरुङको भन्दा १ सय ५६ मत बढ़ी परेको छ । यसरी हेर्दा वडाध्यक्ष बराललाई एमाले समर्थित कार्यकर्ता भन्दा बाहिरबाट समेत मत आएको देखिन्छ । त्यस वडामा नेपाली कांग्रेसका धेरै नेताहरु समेत रहेकोले काँग्रेस उम्मेदवार गिरीको पराजयले विभिन्न प्रश्नहरु उब्जिएको बताईन्छ ।

खुल्ला सदस्यमा गोविन्द बराल र हिराकाजी श्रेष्ठ, महिला सदस्यमा पवित्रा पौडेल र दलित महिला सदस्यमा लक्ष्मी विक विजयी भएका छन् । उनीहरु सबै नेकपा एमालेको तर्फबाट उम्मेदवार बनेका हुन् ।