पोखरा । कास्कीको अन्नपूर्ण गाउँपालिका–११ का नवनिर्वाचित जनप्रतिनिधिले पदभार ग्रहण गरेका छन् । बिहीबार वडाध्यक्ष हिमबहादुर गुरुङ र सदस्यहरुले पदभार ग्रहण गरका हुन् । पदभार ग्रहणपछि तीन वटा निर्णय गरिएको छ ।

जनप्रतिनिधि भएबापत प्राप्त हुने तलबको केही प्रतिशत पाँचै जनाले वडाको विपत कोषमा जम्मा गर्ने घोषणा गरेका छन् । त्यस्तै गाउँमा जडीबुटी खेतीलाई प्रोत्साहन गरिने भएको छ । ‘वडाभित्रका बाँझो जमिन खाली नराखी ठाउँअनुसारको कृषि जडिबुटी उत्पादन गर्ने,’ दोस्रो निर्णयमा भनिएको छ ।

वडाका सबै घरमा धारा पुर्‍याउने योजना जनप्रतिनिधिको छ । ९ सय हाराहारी घरधुरी रहेको अन्नपूर्ण, ११ का ६० प्रतिशत घरमा खानेपानी पुगेको छ । गाउँपालिका, संघ र प्रदेश सरकारसँग समन्वय गरेर खानेपानी समस्या समाधान गर्ने र घरघरमा पानी पुर्‍याएर छोड्ने नवनिर्वाचित अध्यक्ष हिमबहादुरले प्रतिबद्धता जनाए ।

गत ३० वैशाखको चुनावबाट वडाध्यक्षमा हिमबहादुरसहित एमालेको प्यानलै विजयी भएको थियो । खुला सदस्यमा जगन गुरुङ, राम गुरुङ, महिला सदस्यमा राधा गुरुङ र दलित महिला सदस्यमा आसमाया विक निर्वाचित भएका थिए।

हिमबहादुर दोस्रो कार्यकालका लागि वडाध्यक्ष निर्वाचित भएका हुन् । उनको नेतृत्वमा यसपटक नयाँ वडा सदस्य आएपछि २०७४ सालमा निर्वाचितलाई बिहीबार बिदाइ गरिएको छ । अघिल्लो चुनावबाट सदस्यमा रुद्रबहादुर क्षेत्री र इन्द्रमणी जैसी, महिला सदस्यमा जगनमाया गुरुङ र दलित महिला सदस्यमा प्रमिला विक विजयी भएका थिए ।