रञ्जन अधिकारी  पोखरा, २० माघ / सत्र वर्ष अघिदेखि सहारा क्लबले आयोजना गरेको फुटबल प्रतियोगिताको फाइनलमा पहिलो पटक नेपाल पुलिस क्लब र थ्रीस्टार क्लब शनिबार खेल्दैछन् । पोखरा रंगशालामा अहिले दिउँसो उपाधिका लागि यी दुई टीम आमनेसामने हुँदैछन् ।

पुलिस क्याराभान गोल्डकपसहित गोल्डकपको फाइनलमा नवौं पटक पुगेको हो भने पाँच पटक उपाधि जितिसकेको छ । अर्को टोली मनाङ मस्र्याङ्दीले पनि पाँचै पटक उपाधि उचालेको छ । २०५८ मा क्याराभान सहित पुलिसले पहिलो, छैटौं, सातौं र आठौं संस्करणमा उपाधि जितेको हो । पुलिस २०६० देखि ६३ सम्म फाइनल पुगेर पनि लगातार पराजित भयो । २०६३ मा मात्र पुलिस आएन । त्यसपछि लगातार तीन वर्ष जितेको पुलिसको अन्तिम उपाधि नै २०६६ को आर्ठौं संस्करणको हो । सात वर्ष पछि पुलिसले उपाधिका लागि खेल्दैछ ।

पाचौं पटक फाइनलमा पुगेको थ्रीस्टार यसअघि चार पटक फाइनल खेल्दा उपाधि नगुमाएको एक मात्र टीम हो । पाँचौ, नवौं, एघारौं र तेह्रौं संस्करणको उपाधि विजेता थ्रीस्टारको यो ११ औं सहभागिता हो । गत वर्ष फुटबल नै नखेलेको थ्रीस्टार १५ औं संस्करण सँगै बाह्रौं, आठौं, चौथौं, दोस्रो र क्याराभानमा पोखरा आएन ।

यसअघिका पाँच भेटमा पुलिसले तीन पटक र थ्रीस्टारले दुई पटक नतिजा आफ्नो पक्षमा पारेको छ । पछिल्लो पटक १३ औं संस्करणमा सेमिफाईनलमा थ्रीस्टारले पुलिसलाई १–० गोलले हराएको थियो । नवौं संस्करणमा थ्रीस्टारले नै पुलिसलाई १–० गोलले पराजित गर्दा त्यसअघि सातौंमा क्वार्टरफाइनलमा थ्रीस्टार पुलिससँग २–० गोलले हारेको थियो । छैटौंमा पनि क्वार्टरफाईनलमै थ्रीस्टारलाई १–० ले हराएको पुलिसले पहिलो पटक तेस्रो संस्करणको क्वार्टरफाईनलमा २–१ ले हराएको थियो ।

जारी प्रतियोगितामा पुलिस प्रिक्वार्टरबाटै खेलेको हो भने थ्रीस्टार सिधै क्वार्टरफाइनल खेलेको हो । पुलिसले पहिलो खेलमा झापा ११ लाई १–०, क्वार्टरफाइनलमा साविक विजेता मनाङ मस्र्याङ्दीलाई ३–१ र सेमिफाइनलमा धरान एफसीलाई १–० गोलले पराजित ग¥यो । थ्रीस्टारले भने एपीएफलाई टाइब्रेकर र उत्तर बरिन्धरा, बंगलादेशलाई ५–० गोलले हराएको हो ।

गत हप्तामात्र मदन भण्डारी मेमोरियल ईटहरी गोल्डकपको उपाधि जितेको थ्रीस्टार जितलाई निरन्तरता दिँदै लगातार दोश्रो उपाधि जित्ने दाउमा छ । यसमा प्रशिक्षक मेघराज केसी र कप्तान विक्रम लामा ढुक्क छन् । पोखरामा क्वार्टरफाइनल र सेमीफाइनलमा वर्क परमिट नभएका कारण विदेशी खेलाडी मैदान उतार्न नपाएको थ्रीस्टारले फाइनलमा भने गुमाउँदैन ।

प्रशिक्षक केसीका अनुसार अफ्रिकन खेलाडी पिटर सेगुन र अजेयी मार्टिनको वर्क परमिट आइसकेको छ र उनीहरु फाइनल खेलमा मैदान उत्रिनेछन् । केसीले शनिबार आफूहरु जित्नको लागि मैदानमा उत्रिने बताए । उनले भने – ‘प्रतिद्वन्द्वी टिमलाई हामी कमजोर आँक्दैनौं, तर उनीहरुले भन्दा हामी बढी मेहनत गरेर खेल्छौं र जित्छौं पनि ।’ यस्ता प्रतियोगिताको उपाधि मनोवल उच्च बनाउनका लागि हुने भएकाले जितका लागि कुनै कसुर बाँकी नराख्ने बताए ।

थ्रीस्टारका कप्तान विक्रम लामाले इटहरी गोल्डकप जितेपछि मनोवल उच्च भएकाले पोखरामा पनि उपाधि पनि जित्नेमा आशावादी रहेको बताए । उनले आफूहरुले खेलको लय समातिसकेको र जित्नैपर्छ भन्ने चाहना खेलाडीमा रहेकाले खेलमा शतप्रतिशत दिने बताए ।

पुलिसका प्रशिक्षक अनन्तराज थापाले आफ्ना खेलाडीले लय समातिसकेकाले राम्रो टीम गेम देखाउने बताए । फाइनल खेल सँधै टफ हुने भन्दै त्यसमा खेलाडीले न्याय दिएर उपाधि दिलाउने विश्वास व्यक्त गरे । उनले भने – ‘१५, २० दिनको छोटो समयमै मेरा खेलाडीले लय समात्ने कोशिश गरिरहेका छन् । बलिया टिमलाई पनि पराजित गरेकाले मनोवल पनि उच्च छ, यो पोजिटिभ साइन हो ।’ थ्रीस्टारलाई नेपाली फुटवलको पावर हाउस भनेका उनले आफूहरु डराएर नभई जित्नेगरी खेल्ने बताए । उनले पहिले थ्रीस्टारबाट समेत खेलेको र थ्रीस्टार विरुद्ध खेलेको स्मरण गरे ।

पुलिसका कप्तान हेम तामाङले पछिल्ला खेलहरुमा बलिया टिम हराएकाले मनोवल उच्च बनेकाले त्यो फाइनल खेलका लागि सहयोगी हुने बताए । उनले प्रशिक्षककै निर्देशनअनुसार खेलेर उपाधि जित्ने दाबी गरे ।

थ्रीस्टारमा कप्तान लामासँगै नेपाली राष्ट्रिय टिमका वैकल्पिक गोलकिपर एलन न्यौपाने, इटहरी गोल्डकपमा सर्वोत्कृष्ट खेलाडी अनन्त तामाङ, निराजन खड्का, विश्वास श्रेष्ठ लगायत खेलाडी छन् ।

युवा खेलाडीले भरिएको पुलिससँग राष्ट्रिय टिममा स्थान बनाउने सम्भावना बोकेको गोलकिपर शत्रुघन चौधरी छन् । कप्तान हेम तामाङ, सुमन लामा, रवि पासवान, अभिषेक रिजाल, निरकुमार राई, अजित भण्डारीलगायतका खेलाडी छन् ।