गण्डक न्युज पोखरा, २० माघ / राष्ट्रिय खेलकुद परिषद्का सदस्य सचिव केशवकुमार विष्टले पोखरालाई खेलकुदको राजधानी बनाउने घोषणा गरेका छन् । उनले स्पोर्टस् सिटीका रुपमा पोखरालाई अघि सार्ने बताए ।

१६ औं आहा रारा गोल्डकपमा समापनि कार्यक्रमका प्रमुख अतिथि उनले त्यसका लागि केहि समयपछि नै खेलकुदकर्मीसहित सरोकारवालाहरुसँग बसेर छलफल गर्ने बताए । उनले आगामी आहा रारा गोल्डकप नयाँ रंगशालामा खेलाउन पाइने दाबी गरे । पुरानो रंगशाला भत्काउने कार्य भइरहेको र त्यसमा नयाँ रंगशाला एक वर्ष भित्रै बनाई सकिने विष्टले बताए ।

सदस्य सचिव विष्टले अब देशैभरी हुने गोल्डकपको प्रथम पुरस्कार राखेपले दिने घोषणा गरे । प्रथम पुरस्कारको राशी २५ लाख वा त्यो भन्दा माथि हुनुपर्ने र नाममात्रको गोल्डकप होईन, सुनकै कप हुने गरी अघि बढ्नुपर्ने बताए ।

पोखराको पहिचान अब फेवाताल मात्र नभएको बताउदै उनले पोखराको पहिचान खेलकुद र फुटबल समेत भएको उनले बताए । कार्यक्रममा मुख्य प्रायोजक हिमश्री फुड्स प्रालिका अध्यक्ष एवं सांसद सूर्य बहादुर केसीले पोखरामा खेलकुदको पुर्वाधार आवश्यक भएको बताए ।