एजेन्सी २७ असार । क्रोएसिया विश्वकप फुटबलको फाइनल प्रवेश गरेको छ । नेपाली समय अनुसार बुधवार राती सम्पन्न सेमिफाइनलमा इंग्ल्याण्डलाई २-१ ले पराजित गर्दै क्रोएसियाले उपाधि यात्रा तय गरेको हो ।

निर्धारित ९० मिनेटको समय १-१ को बराबरीमा रोकिएपनि थपिएको समयमा एक गोल थप्दै क्रोएसियाले फ्रान्ससँगको उपाधि भिडन्त पक्का गर्‍यो । खेलको सरुवाती पाचौं मिनेटमै ट्रिपियरले अग्रता दिलाएको इंग्ल्याण्ड ६८ औं मिनेटमा बराबरीमा रोकियो ।

क्रोएशियाका खेलाडी इभान पेरिसिकले इंग्ल्याण्ड बिरुद्ध बराबरी गोल फर्काएका थिए । निर्धारित समयमा दुबै तर्फबाट थप गोल हुन नसकेपछि खेल अतिरिक्त समयमा धकेलिएको थियो । अतिरिक्त समय (१०९ औं मिनेट ) मा मारियो माज्डुकिकले निर्णायक गोल गर्दै क्रोएसियालाई पहिलो पटक फाइनलमा पुर्‍याए ।

आज पराजित इंग्ल्याण्ड तेस्रो स्थानका लागि हिजो फ्रान्ससँग पराजित वेल्जियमसँग भिड्नेछ । तेस्रो स्थानका लागि शनिवार राती खेल हुनेछ । उपाधि भिडन्तमा १२ बर्षपछि पुन ः फाइनल पुगेको फ्रान्स अब्बल सावित हुन्छ वा क्रोएसिया आइतवार राती टुंगो लाग्नेछ ।