पोखरा ः गण्डकी प्रदेशका मुख्यमन्त्री पृथ्वी सुब्बा गुरुङ साताब्यापी चीन भ्रमणका लागि निस्केका छन् । चीनको हाइनान प्रान्तको राष्ट्रिय दिवशमा प्रमुख अतिथिको निम्तो पाएसँगै मुख्यमन्त्री गुरुङको टोली त्यसतर्फ प्रस्थान गर्न पोखराबाट काठमाडौँ गएका हुन् । उनी मंगलबार चीन उँड्नेछन् ।
मुख्यमन्त्री भैसकेपछि उनको यो पहिलो विदेश भ्रमण हो भने नेपालकै मुख्यमन्त्रीहरुमध्ये दोश्रो भ्रमण उनको हो । हाईनानको राष्ट्रिय दिवसमा प्रमुख अतिथिको रुपमा उनलाई निम्तो पठाईएको थियो । कार्यक्रमलाई लक्षित गरी चाइना गएपनि गण्डकी प्रदेशको विभिन्न क्षेत्रको विकासका बारेमा छलफल हुने मुख्यमन्त्रीले बताए । उनले गण्डकी प्रदेशले प्राविधिक शिक्षालय, अन्तराष्ट्रिय सम्मेलन केन्द्र, होमस्टे, अर्गानिक कृषि उत्पादन, हाईड्रो र सोलार उर्जा, प्रदेशभित्रका हरेक स्थानीय तहका केन्द्रमा सडक सञ्जाल विस्तार, विशेष औद्योगिक क्षेत्र निर्माणका लागि साझेदारी गर्ने तयारी गरेको बताए ।
चाइना जानकारे लागि काठमाडौँ जानु अघि सोमबार पोखरा एयरपोर्टमा पत्रकारहरुसँग कुराकानी गर्दै उनले प्रदेशको आवश्यकता अनुसार लगानी र अनुदानका लागि आह्वान गर्ने बताए । काम नहुने खालको उधारो सम्झौता नगर्ने उनको प्रतिवद्धता छ ।
‘संघमा यस्ता काम नभएको कारण नै उधारो सम्झौताका कारण हो । हामी उधारो सम्झौता गर्दैनौं । आपसी समझदारी गर्छौं तर देखाउनकै लागि धेरै सम्झौता हुँदैनन् उनले भने ‘आफ्ना स्वार्थ र हित, समृद्धी, लक्ष्यसँग मिल्ने कुरामा मात्रै हाम्रो ध्यान छ । साझेदारी मात्रै हुन्छ अन्तिम सम्झौता हुँदैन । लगानी केन्द्रित गर्न गृहकार्य गरेर आउने हो ।’
विना योजना लगानी र अनुदानका लागि सम्झौता नगर्ने भएकोले भ्रमणबाट हौसिनुपर्ने अवस्था नरहेको मुख्यमन्त्री गुरुङको भनाई छ । ‘हामीसँग कुनै डिपिआर छैन, सम्भाब्यता अध्ययन भएका छैनन् । तर सम्भावनाका क्षेत्र देखाएर फर्किन्छौं, उनी भन्छन ‘यो भ्रमणबाट हौसिनुपर्ने कुरा छैन । स्वार्थ विना कसैले लगानी गर्न खोज्दैन, त्यही स्वार्थभित्र हाम्रो फाईदा खोज्ने हो । हाम्रा योजना र लक्ष्य सुनाउँछौं ।’
मुख्यमन्त्री भएपछि पहिलो पटक विदेश भ्रमणमा निस्केका गुरुङले त्यहाँका शिक्षालय, सम्मेलन केन्द्र, हाईड्रो र सोलार उर्जाको अवलोकन गर्ने कार्यक्रम रहेको सुनाए । भ्रमण दलका सदस्य मूख्यन्यायधिबक्ता राजेन्द्र घिमिरेले दुई प्रदेशबीच साझेदारी सम्झौता मात्रै हुने बताए । ‘सहयोग पायौं भन्दैमा अन्धाधुन्धा सहयोग लिने होईन । हाम्रा प्राथमिकताका क्षेत्रमा मात्रै सहयोग लिन्छौं, उनले भने ‘म्यूचुअल एग्रिमेण्ट हुन्छ ।’ मुख्यमन्त्री गुरुङले आइतबार प्रदेश सभालाई विशेष सम्बोधन गर्दै हाईनान र गण्डकी प्रदेशबीच भगिनी सम्बन्ध कायम हुने बताएका थिए ।
टोलिमा मुख्यमन्त्री गुरुङ, मुख्यन्यायधिबक्ता घिमिरे, नीति तथा योजना आयोगका उपाध्यक्ष डा. गिरीधारी शर्मा र प्रमुख सचिव लक्ष्मीराम पौडेल सहभागी छन् । त्यस्तै हाइनान प्रदेशकै चाहनामा यहाँका पर्यटन तथा उद्योग क्षेत्रका ब्यवसायीहरु पनि भ्रमणमा सहभागि हुनेछन् ।