पोखरा, असोज १२ गते । कास्कीका एक युवक एक सातादेखि बेपत्ता भएका छन् । नेपाली सेनाको महेन्द्र नगर ब्यारेक, धनुषामा कार्यरत ऋषि ओझा सम्पर्कविहीन भएका हुन् ।

कास्कीको रुपा गाउँपालिका-२, थुम्की, सिर्कुतानका मङ्गलप्रसाद ओझाका २ भाइ छोरामध्ये जेठो ऋषि छुट्टी सकेर घरबाट हाजिरमा जाँदा बाटैमा अपहरणमा परेका हुन सक्ने पारिवारिक स्रोतले जनाएको छ । सारंगी न्यूजका लागि रुपिन्द्र प्रभावीको समाचार छ ।

यस्तो छ घटना विवरण :

वि.सं. २०७४ असारमा नेपाली सेनामा भर्ती भएका ऋषि काजमा धनुषामा कार्यरत थिए । करिब एक हप्ताको घर बिदा सकेर असोज ७ गते ब्यारेक जान थुम्कीबाट हिंडेका उनी पोखराको पृथ्वीचोकस्थित दिदी महेश्वरी ओझाको पसलमै बास बसेका थिए ।

दिदीका अनुसार ८ गते बिहान ३:३० बजे हाजिरमा जान भन्दै कोठाबाट निस्केका उनी नारायणगढ पुग्दा सम्पर्क भएको थियो । केही समयपछि पुनः सम्पर्क गर्दा अबको केही क्षणमा ब्यारेक पुग्ने जानकारी दिएका थिए उनले । हाजिरमा नगएका उनले असोज १० गते राती ८:४२ मा ब्यारेकमै कार्यरत एक साथीलाई एसएमएस गरी आफू अपहरणमा परेको जानकारी दिएका थिए ।

`अपहरणमा परेको छु, हाजिरमा आउन सकिनँ, बन्द कोठाभित्र छु, ५ लाख रुपैयाँ फिरौती मागेको छ ।´ भनेर पटक पटक एसएमएस गरेको र त्यसपछि मोबाइल स्विच अफ भएको पारिवारिक स्रोतले बताएको छ ।

उनी कार्यरत ब्यारेकबाट भोजराज कार्कीले असोज ११ गते दिउँसो २:३० बजेतिर `तपाईंको मान्छे ८ गते हाजिर हुन आउनुपर्नेमा नआएको भन्दै के भएको हो ?´ भनेर जानकारी मागेपछि मात्रै परिवारलाई यससम्बन्धी जानकारी भएको थियो ।

उनका सहोदर साना बाका छोरा अमृत ओझासँग म्यासेन्जरमा कुरा हुँदा आफू भारततिर रहेको र तनावमा रहेको बताएको पनि जानकारी प्राप्त भएको छ । ब्यारेकले सेना र प्रहरीको सहयोगमा खोजी गरिरहेको जनाएको छ ।

कान्छो भाइ सुदिप ओझा पनि नेपाली सेनाकै विजयपुर ब्यारेकमा कार्यरत छन्