पोखरा ः पोखरा महानगरपालिका–३१ पचभैयास्थित सिमलडाँडा निवासी धनकुमारी गुरुङको ११५ वर्षको उमेरमा निधन भएको छ । केही दिन देखि ज्वरो लगायतको रोगले थलिएकी धनकुमारीको शुक्रबार बिहान आफ्नै घरमा निधन भएको छिमेकी दामोदर भक्त थापाले जानकारी दिए ।

सम्भवतः नेपालकै ज्येष्ठ नागरिकका रूपमा रहेकी गुरुङको निधन भएको हो । नेपाली नागरिकता अनुसार विसं १९६० भदौ ७ गते जन्म मिति रहेको गुरुङको छोरा र नातिको समेत मृत्यु भइसकेको छ ।

‘उहाँको छोरा त थिएन, धर्मनातीको रुपमा इमानसिङ गुरुङलाई पाल्नु भएको थियो । उसको पनि मृत्यु भइसक्यो’ थापाले भने ‘अहिले उहाँको किरिया पनि धर्मनातीका छोरा राजु र उनका बहिनीका छोरा भोजबहादुर बसेका छन् ।’ उनै ३६ वर्षीय पनाती राजु गुरुङले उनको पालनपोषण गर्दै आएका थिए । स्वर्गीय गुरुङको शुक्रबार नै गुरुङ परम्पराअनुसार अन्तेष्ठी गरिएको छ ।

गुरुङले भारतिय आर्मीको पेन्सन बुझ्दै आएकी थिईन् । भारतिय सेनाको पनि गोरखा राइफलमा भर्ति भएका श्रीमान लालबीरको मृत्यु भएपछि उनै पनातीको सहयोगमा धनकुमारीको नाममा पेन्सन पट्टा नामसारी गरिएको थियो । उनीसँगैका सबै साथीहरुको पनि निधन भइसकेको छ ।