स्वार्थ समूहले आफू अनुकूल नभएपछि बदनाम गराउने अनेक माध्यम प्रयोग गर्छन्, मिडिया समेत प्रयोग हुन्छ – मन्त्री अधिकारी

स्वार्थ समूहले आफू अनुकूल नभएपछि बदनाम गराउने अनेक माध्यम प्रयोग गर्छन्, मिडिया समेत प्रयोग हुन्छ – मन्त्री अधिकारी

rabindra-adhikari

पाेखरा । संस्कृति, पर्यटन तथा नागरिक उड्डयन मन्त्री रविन्द्र अधिकारीले आफ्नो कामले स्वार्थ समूहलाई धक्का पुगेकै कारण बदनाम गराउने अनेक माध्यम प्रयोग गरेको बताएका छन् । वाईडबडी खरिद प्रक्रियामा आफ्नो गल्ती भए राजनीतिबाटै सन्यास लिने उद्घोष गरेका छन् । अनलाईनखवरसँगको कुराकानीमा उनले वाईडबडी खरिदमा आफुले कुनै कमजोरी नगरेको दावी गरे ।

पूर्ण अन्तर्वाता पढ्नका लागि यहाँ क्लिक गर्नुहोस्: वाइडबडी खरिदमा मेरो गल्ती भेटिए राजनीतिबाटै सन्यास लिन्छुः पर्यटन मन्त्री

मन्त्री अधिकारीले मन्त्रालयबाट राम्रो काम गर्न खोज्दा आफूमाथि प्रहार भइरहेको गुनासो गरे । चिनियाँ वाइडबडी विमान खरिद प्रकरणमा अघिल्लो सरकारका पालामा अनियमितता भएको हुन सक्ने भन्दै मन्त्री अधिकारीले छानविन हुनुपर्ने बताए ।

‘यसमा मेरो यदि अलिकति पनि संलग्नता कसैले छानविनका क्रममा भेटेछ भने दाबाका साथ भन्छु जिन्दगीभरि राजनीतिक सन्यास लिन्छु, उनले भने–वाइडबडी खरिद प्रक्रियामा जिरो प्रतिशत पनि संलग्न छैन । थोरैमात्र पनि कुनै डर छैन । किनकि जब बिराइँदैन भने डर हुन्न क्या ।’

३ वर्षअघिकै प्रक्रिया आफुँले अघि बढाएको भन्दै उनले अहिलेको सरकारलाई आरोप लगाउने वाहियात कुरा भएको तर्क गरे । यसमा तपाईहरु प्रष्ट हुनुस् । यो ३ वर्षअघिको प्रक्रिया हो । वाइडबडीको सन्दर्भमा धेरै पछाडि अर्थात हामी सरकारमा आएको एक महिनापछि आएको जहाज हो यो । एक महिनामा जहाज आउँछ ? एक महिनामा कलम किन्ने प्रक्रिया पुग्दैन नेपालको सरकारी कार्यालयमा । गाडी किन्न एक वर्ष लाग्छ । यसमा हामीलाई चार्ज लगाउनु त बेकारको, वाहियात कुरा हो ।’

‘म भन्न चाहान्छु यसमा अनियमितता देखिँदा खोज्ने, छानविन गर्ने जति पनि संस्था छन्, उनीहरुलाई छानविनमा सघाउँछौं । जे सूचना चाहिन्छ, दिन्छौं, उनले भने–तर, यसको नाममा नेपाल एयरलाइन्सलाई समाप्त पार्ने काम चाहिँ नगरौं । नेपाल एयरलाइन्स प्रभावकारी रुपमा चलाउनुपर्यो । अनियमतिता गर्ने व्यक्तिलाई कारवाही गर्नुपर्यो ।’

वाइडबडीमा अनियमितता भएको आशंकामा अख्तियार र संसदीय समितिले पनि छानविन थालेको छ । बाहिर आएका होहल्लाका पछि नलाग्न र सरकारले गरेका राम्रा कामको बचाउ गर्न उनले नेता तथा कार्यकर्तासँग आग्रह गरेका छन् ।

‘अन्तर्वार्तामा उनले भनेका छन्ः ‘मन्त्रालयअन्तर्गत केही कामहरु यस्ता छन् र कतिपय यस्ता स्वार्थ समूहहरु छन्, जसलाई नचिरीकन सुशासन कायम हुन सक्दैन । जसलाई क्रस नगरी परिणाम निकाल्नै सकिन्न । जसलाई पन्छाएर अगाडि नबढी यो मन्त्रालयले अग्रगति हासिल गर्न सक्दैन । समग्रमा आर्थिक विकास र प्रगतिको जुन मुख्य अभियान सम्माननीय प्रधानमन्त्रीज्यूको हो, त्यसमा पर्यटन क्षेत्रबाट हुनुपर्ने योगदान हुन सक्दैन । त्यसैले गर्दा काम गर्न खोज्यो कि विवाद त ल्याउँछन् नै । कि त केही पनि नगरी बस्नुपर्यो । वरपर सर्प बिच्छी बाघ भालु छन् भने कि त पूजा गरेर बस्नुपर्यो । होइन भने आफ्नो उद्देश्य हासिल गर्नको निमित्त त्यसलाई तोडेर जानुको विकल्प छैन ।

त्यो स्वार्थ समूहले आफ्नो अनुकुल काम भएन भने सबै अवयवहरुलाई प्रयोग गर्छ । त्यस क्रममा मिडिया पनि प्रयोग हुन्छ । त्यसको नेक्सस कति ठाउँमा छ त आफैं खोज्न सक्नुहुन्छ । उसले आफ्नो स्वार्थमा धक्का लाग्ने गरी सरकारले काम गर्यो भने सबै शक्ति लगाएर बदनाम गराउन खोज्छ । मैले यो कुरा राम्ररी बुझेको छु । त्यसैले बदनाम गराउन खोज्ने त्यो स्वार्थ समूहसँग सम्झौता गर्नेभन्दा कामबाट परिणाम निकाल्ने बाटो रोजेको हुँ । यस्तो गर्दा स्वार्थ समूहले आफू अनुकुल नभएपछि बदनाम गराउने अनेक माध्यम प्रयोग गर्छन् । विभिन्न तरिकाबाट खेद्ने काम हुन्छ । कतिपयलाई हो कि जस्तो पनि बनाइन्छ । तर, यस्ता कुराबाट डराउनु हुँदैन ।’

फेक रेस्क्युका बारेमा पनि उनले स्पष्ट पारेका छन् । ‘उदाहरणका लागि फेक रेस्क्यु । पर्यटकलाई अप्ठेरोमा लगेर खानामा गलत कुरा मिसाएर विरामी पार्ने अनि हेलिकोप्टर मगाएर रेस्क्युका नाममा करोडौं कमाउने गिरोहसँगको लडाइ त चानचुने थिएन । यस्तो माफिया गिरोहसँग सम्झौता नगरेपछि उल्टै बदनाम गराउन उनीहरुले सबै बल प्रयोग गर्दा रहेछन् ।

गलत धन्दाबाट धेरैले आफूलाई बलियो बनाएका रहेछन् । उनीहरु त यस्तो कम्मर कसेर लागे कि जसरी पनि कि हामी छैनौं कि मन्त्री छैन भन्नेसम्म भयो । यस्तो काम गरेपछि आरोप त आउने रहेछ । यस्ता गिरोहको प्रभाव सबैखाले मिडियामा पनि हुँदो रहेछ । म तपाईलाई एउटा उदाहरण दिन्छु– नेपाल एयरलाइन्सको वाइडबडी । वाइबडी खरिदको प्रक्रिया तीन वर्षअघिको हो । सबै स्पेसिफिकेशनसहित कस्तो ल्याउने, कसरी किन्ने, भुक्तानी कसरी गर्ने ती सबै म आउनुभन्दा अगाडिका प्रक्रिया थिए ।

ती अगाडिका प्रक्रियामा मन्त्रीको केही भूमिका हुन्न । म आउँदाखेरि जहाज आउने कुराको सुनिश्चिता खोजेँ । हाम्रो पैसा गइसक्यो । पैसा जाने जहाज नआउने ? त्यो अवस्थाचाहिँ हुनुहुँदैन । जहाज ल्याउनुपर्यो , ती प्रक्रियामा कमजोरी भएका छन् भने खोज्नुपर्यो । छानविन गरेर दोषी पाइयो भने कारवाही गर्ने, तर जहाजलाई चाहिँ नरोक्ने भनेको हो ।’

प्रतिक्रिया

लेखकको बारेमा

गण्डक न्यूज

गण्डक न्यूज

गण्डक न्यूज डेस्क

ट्रेन्डिङ