श्यामशितल परियार, लमजुङ । सुन्दरबजार नगरपालिका–९, मा रहेको फ्युचर स्टार आवसीय माविले आफ्नो रजत जयन्ती विभिन्न कार्यक्रमका बीच मनाउने भएको छ । विद्यालयले विद्यालयकै सभाहलमा आयोजित पत्रकार सम्मेलनमा यसबारे जानकारी गराएको हो ।

पत्रकार भेटघाट कार्यक्रममा विद्यालयका संस्थापक बाबुराम पौडेलले पौष १८ वा २६ गते विद्यालयले रजती मूल समारोह भव्यताका साथ मनाउने जानकारी दिए । ‘हामीले विगतमा पौष १८ मै विद्यालयको वार्षिकोत्व मनाउँदै आएका छौँ । विभिन्न चाडपर्व पनि परेका छन् । हामीले यसपाली पौष २६ गते रजत जयन्ती मनाउन सक्छौँ,’ उनले जानकारी गराए ।

विद्यालयका संस्थापक पौडेलका अनुसार रजत जयन्तीको अवसरमा विद्यालयले मंसिर महिनाभर विभिन्न जिल्लाव्यापी कार्यक्रम सञ्चालन गर्नेछ । उनका अनुसार विद्यालयले मंसिरमा जिल्लाका ८ वटै स्थानीय तहमा अन्तर मावि हाजिरीजवाफ प्रतियोगिता एकैदिन सञ्चालन गर्नेछ । गाउँपालिकाका लागि एउटै र नगरपालिकाका लागि एउटै प्रश्न हुनेछन् ।

विद्यालयका अनुसार विद्यालयले माविस्तरीय जिल्लाव्यापी भलिवल प्रतियोगिता सञ्चालन गर्नेछ । ज्येष्ठ नागरिकलाई सम्मानित गर्नेछ । रजत जयन्तीलाई सफल पार्न विद्यालयले १ सय ५२ सदस्यीय मूल समारोह समिति, ३५ सदस्यीय कार्य सम्पादन समिति, १७ सदस्ीय सल्लाहकार समिति गठन गरेको छ । विभिन्न ७ उपसमिति समेत गठन गरेको छ ।