संस्कृति, पर्यटन तथा नागरिक उड्डयनमन्त्री रवीन्द्र अधिकारीले लेखा समिति अन्तर्गतको उपसमितिको प्रतिवेदनबाट आफू अचम्मित भएको प्रतिक्रिया दिएका छन् ।

मन्त्री अधिकारीले वाइडबडी प्रकरणमा आफू पनि मुछिएको घटनाबाट दुःखी र अचम्मित भएको बताए । मन्त्रालयको मुख्य व्यक्ति भएकाले केही कन्सर्न आउनु स्वभाविक नै भएपनि तर यो खालको समस्या आउला भनेर नसोचेको उनको भनाई छ।

संसदीय प्रणाली र संसदीय समितिको आफूले सधैँ सम्मान गर्ने अधिकारीको भनाई छ । ‘मैले मन्त्रालय सम्हालेपछि वाइडबडीको बारेमा थप निर्णय केही भएको छैन, प्रक्रिया पहिल्यै पूरा भैसकेको थियो’- मन्त्री अधिकारीले थपे ।

संसदको लेखा समितिले बनाएको उपसमितिले मंगलबार प्रतिवेदन टुंग्याउँदै वाइडबडी खरिदमा ४ अर्ब ३५ करोड अनियमितता भएको निष्कर्ष निकालेको छ ।

उपसमितिले बहालवाला मन्त्री रवीन्द्र अधिकारी, पूर्वमन्त्री जीवनबहादुर शाही र जितेन्द्रनारायण देव, त्यसैगरी बहालवाला पर्यटन सचिव कृष्ण देवकोटा, हाल गृहसचिव रहेका तत्कालीन पर्यटन सचिव प्रेम राई र पूर्व सचिव शंकर अधिकारीलाई कारबाहीको सिफारिस गरेको छ ।

त्यस्तै, वायुसेवा निगमका महाप्रबन्धक सुगतरत्न कंसाकारलाई तत्कालै निलम्बन गरेर कारबाही गर्न पनि उपसमितिले सिफारिस गरेको छ ।

उपसमितिको प्रतिवेदन आजै लेखा समितिको पूर्ण बैठकमा पेश गरिएको छ ।