आशिष पुरी , पोखरा । नेपालमा पर्यटन व्यवसायमा उर्जाशिल युवा जनशक्तिको उच्च सहभागिताका साथ पर्यटनमा सकारात्मक परिवर्तन ल्याउने उद्देश्यले यहि फाल्गुण १८ अर्थात आउँदो शनिबार देखि पोखरामा टुरिजम डिजीटलाइजेसन च्यालेन्ज कार्यक्रम हुँदै छ ।उर्जा ल्याबको आयोजना तथा नेपाल पर्यटन बोर्डको बिशेष सहकार्यमा उक्त कार्यक्रम आयोजना गर्न लागिएको हो ।

पोखराको होटल स्नो ल्याण्डमा हुने ३ दिवसीय सो कार्यक्रममा पर्यटन क्षेत्रमा युवाशक्तिको सम्भावना,चुनौती लगायतका बिषयमा छलफल हुने छ । प्रतियोगीहरुले पर्यटन क्षेत्रका सम्भाबना एबम चुनौतीलाई औंल्याउँदै त्यसको समाधानका लागि आफ्नो आइडिया प्रस्तुत गर्ने छन् । प्रस्तुत गरिएका आइडिया मध्ये उत्कृष्ट टिमलाई पुरस्कृत गरिने छ भने उक्त आइडियालाई मुर्त रुप दिनको लागि लगानीकर्ता समेत खोजिने उर्जा ल्याबका कार्यकारी निर्देशक बिबेक सापकोटाले बताए ।

आयोजकका अनुसार कार्यक्रममा हाल सम्म १७ ओटा टिम दर्ता भएका छन् भने हरेक टिममा ३ जना सदस्य रहने छन् । सो कार्यक्रमको उद्देश्य ” भिजिट नेपाल २०२०” लाई सफल पार्नु समेत रहेको छ ।कार्यक्रमलाई सफल पार्नको लागि घुमन्ते,ड्रिमर्स नेपाल,अफिसियल फ्युचर टेक,हज्मा वेयर,डब्लुपी ट्राभल्स,सिएफ मोटो,एनवाइइएफ पोखरा,कट्स पश्चिमान्चल क्याम्पस,होटल बाराही,होटल हिमालय भ्याकेसन, व्यंजन पोखरा,हिमालयन जाभा पोखरा लगायतको सहयोग रहेको छ । यो कार्यक्रमबाट पर्यटन क्षेत्रमै नयाँ आयाम थपिने बिश्वास लिइएको छ ।

जानकारीका लागि : https://tdc.urjalab.org