पोखरा – विश्वव्यापी माहामारीको रुपमा फैलिएको कोरोना संक्रमणका कारण सरकारले आह्वान गरेको झन्डै चार महिना लामो लकडाउनका कारण थन्किएका सार्बजनिक सवारीसाधन आजदेखी सञ्चालनमा आएका छन् । पोखरा नगरभित्र गुड्ने जम्मा ३६० बसमध्ये आज आधाको संख्यामा मात्र सवारी संचालनमा आएका हुन् ।

पोखरा नगरभित्र बिहानैदेखि सार्बजनिक सवारी चलेपनि बसमा यात्रा गर्ने यात्रुहरुको सङ्ख्या भने अत्यन्त न्यून देखियो । छोरेपाटनबाट बिरौटा, राष्ट्रबैंक चोक, सिर्जनाचोक हुँदै बगरसम्मको रुटमा चल्ने माइक्रोका चालक विकास लामाले सभागृह चोकसम्म आउँदा जम्मा ७ जना यात्रु बसमा चढेको बताए । लामाका अनुसार “आफ्नो निजी सवारी नभएका, अफिसियल कामकाजी ब्याक्ति र नगई नहुने अबस्थाका मानिस मात्र सार्बजनिक बसमा चढेका छन । “

त्यस्तै पोखराको हरीचोकबाट चाउथेका लागि छुटेको मिनी माइक्रो बिन्दवासिनी, मालेपाटन जिरोकिमी, पृथ्बीचोक हुँदै बुद्दचोकसम्म आउँदा जम्मा ५ जना यात्रु चढेको चालक अविनाश विकले बताए । पहिले- पहिले आधा किलोमिटर हिंड्न माइक्रो रोक्थे, अहिले टाढा-टाढा पुग्नुपर्ने मानिस पनि पैदलै हिंड्न तम्सिए, ‘खै कोरोना सर्छ भनेर होकी, केले हो ?’  विकले अनभिज्ञता देखाए ।

त्यसो त सार्बजनिक बसमा यात्रुको संख्या कम हुनुमा कोरोनाको त्रासलाई मात्र लिन सकिंदैन । सरकारले साउनभर एउटा जिल्लाभित्र वा एउटा जिल्लाबाट अर्काे जिल्लामा सवारीसाधन चलाउन नपाउने निर्णय गरेका कारण गाउँबाट बिभिन्न उद्देश्यले शहर झरेका अधिकांश मानिस अहिले गाउँमै रोकिएका छन् । बिशेष गरी शिक्षक बिद्यार्थी, निजी संस्थामा काम गर्ने जागिरे तथा ब्यापार व्यवसाय गर्ने धेरै मानिस अहिलेपनि लामो दूरीका सवारी नचल्दा शहर भित्रन पाएका छैनन् ।

सार्वजनिक सवारी सञ्चालन गर्दै आएको पोखराको सबैभन्दा ठूलो कम्पनी पोखरा यातायात प्रालिले आज आधा मात्र सवारी साधन चलाएको जानकारी कम्पनीका प्रबन्ध निर्देशक अमृत शर्माले दिए । ‘आधारभूत सुरक्षा सतकर्ता अपनाएर आज आधा मात्र सवारी साधन सञ्चालनमा ल्याएका छौं शर्माले भने।’ उनका अनुसार पोखरामा कम्पनीमा आबद्ध ३६० सवारी साधन सञ्चालन हुँदै आएका छन् । पोखरामा विभिन्न यातायात कम्पनीका करीब आठ सय बस तथा दुई हजार ५०० ट्याक्सी सञ्चालन हुँदै आएका छन् ।