किरण श्रेष्ठ, तनहुँ । तनहुँका स्थानीय तहहरुले कोरोना भाइरसको संक्रमण समुदायमा फैलिन थालेको भन्दै धमाधम सिल गर्न थालेका छन् ।

तनहुँको भानु नगरपालिकामा ठेकेदारमा कोरोना भाइरसको संक्रमण पुष्टि भएपछि मंगलबारबाट जिल्लाको भानु नगरपालिकाले एक हप्ताका लागि नगरपालिका सिल गर्ने निर्णय गरेको थियो ।

देवघाट क्षेत्र विकास समितिका अध्यक्ष शिवराज पौडेललाई कोरोना संक्रमण देखिएपछि तनहुँको देवघाट गाउँपालिका सिल गरिएको छ ।

गाउँपालिका क्षेत्रमा कोरोना भाइरसको संक्रमण फैलिन सक्ने देखिएकाले गाउँपालिका क्षेत्र एक हप्ताका लागि सिल गर्ने निर्णय गरिएको गाउँपालिकाका अध्यक्ष दुर्गाबहादुर थापाले जानकारी दिए ।

यस्तै, बन्दिपुर गाउँपालिकाले शुक्रबारबाट लागु हुने गरी पुन: एक हप्ता लकडाउन गर्ने निर्णय गरेको छ । शुक्रबार बन्दिपुर गाउँपालिका क्षेत्रभित्र कोरोना संक्रमण फैलिन थालेकोले एक साताका लागि लकडाउन गर्ने निर्णय गरेको हो ।

शुक्रबार मात्रै जिल्लाको भानुमा २० जना संक्रमित थपिएका छन् ।

बन्दिपुर गाउँपालिकाका अनुसार लकडाउनको समयमा गाउँपालिका क्षेत्रभित्र अत्यावश्यक(स्वास्थ्य, संचार, दुग्ध, खाद्यान्न, तरकारी, दाना) बाहेकका सम्पूर्ण बजार, उद्योग, बैंक तथा बित्तिय संस्थाहरु पूर्णरूपमा ठप्प हुनेछन् ।

त्यस्तै अन्यावाश्यक बाहेक घर बाहिर ननिस्किन, सभा तथा सम्मेलन, भोजभतेर तथा खेलकुदका कार्यक्रम नगर्न गाउँपालिकाले अनुरोध गरेको छ ।

साथै घर बाहिर निस्कदा अनिवार्य मास्क लगाउन अनुरोध समेत विज्ञप्तिमा भनिएको छ । मास्क नलगाउनेलाई प्रतिव्यक्ति १०० रुपैयाँ जरिवाना समेत गरिने गाउँपालिकाले जनाएको छ ।

प्रशासनले जिल्लामा सिनेमा हल, पार्टी प्यालेस, व्यूटीपार्लर, शैलुन, डान्सबार, जीमखाना, स्वीमिङपुल सञ्चालन नगर्न तथा फुटपाथ तथा खुल्ला ठाउँमा ठेला, व्यापार, व्यवसाय नगर्न निर्देशन दिँदै आएको छ । तर यसको पूर्णपालना र अनुगमन हुन सकेको छैन ।

संक्रमितको संख्या २१० पुग्यो

तनहुँमा कोरोना संक्रमितको संख्या २१० जना पुगेको छ । यस्तै गरी निको हुनेको संख्या १८० जना रहेका छन् । जिल्लाका ३० जना संक्रमित आइसोलेसनमा रहेका छन् ।

समुदायमा कोरोना संक्रमण हुन थालेसंगै कन्ट्रयाक्ट ट्रेसिङको काम अघि बढाइएको जिल्ला स्वास्थ्य कार्यालय तनहुँका प्रमुख शंकरबाबु अधिकारीले बताए ।

जिल्लाको भानु, देवघाट लगाएतका स्थानिय तहमा समुदाय स्तरमा कोरोना संक्रमण देखिएको छ ।