तनहुँ । जिल्ला प्रहरी कार्यालय तनहुँले एकै दिन २५ जनालाई पक्राउ गरेको छ ।

विभिन्न अपराध एवं मुद्दाहरुमा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगो समेत तिर्न बाँकी रहेका व्यक्तिहरुलाई प्रहरीले पक्राउ गरेको हो ।

जसमध्ये बहुविवाह मुद्दामा ११ महिना १९ दिन कैद तथा १० हजार रुपैयाँ जरिवाना भुक्तान गर्न बाँकी रही बिगत ४ वर्षदेखि फरार रहेका भानु नगरपालिका-१३ सम्जुर बस्ने ३० वर्षीय सुरेन्द्र कुमार श्रेष्ठ, लागूऔषध मुद्दामा ४ महिना १९ दिन कैद भुक्तान गर्न बाँकी रही फरार रहेका बन्दीपुर गाउँपालिका-१ नहाला बस्ने किना परियार, लागूऔषध मुद्दामा ११ महिना १९ दिन कैद भुक्तान गर्न बाँकी रही फरार रहेका बन्दीपुर गाउँपालिका-१ भन्सार बस्ने बर्लमिन भन्ने बहरुल अमिन मिया, त्यस्तै लागूऔषध मुद्दामा फरार अन्य २ जना, जुवा मुद्दामा फरार ५ जना, घरेलु हिंसा मुद्दामा फरार १ जना, दुनियाबादी फौजदारी मुद्दामा फरार ३ जना, नाता कायम मुद्दामा फरार १ जना, अंशबण्डा जग्गा अंश हक कायम मुद्दामा फरार १ जना, सम्बन्ध बिच्छेद मुद्दामा फरार २ जना, कुटपिट मुद्दामा फरार २ जना, जालसाजी मुद्दामा फरार १ जना, डाँका मुद्दामा फरार ४ जना गरी २५ जना फरार प्रतिवादीहरुलाई प्रहरीले पक्राउ गरेको हो ।

यस्ता व्यक्तिहरुलाई पक्राउ गर्न तनहुँ प्रहरीले अहिले अभियाननै सञ्चालन गरेको छ ।

पक्राउ परेकाहरु जरिवाना तथा कैद सजाय फैसला भएका व्यक्तिहरु रहेको तनहुँका प्रहरीका प्रवक्ता एवं प्रहरी नायव उपरीक्षक युवराज तिमल्सेनाले बताएका छन् ।

उनले भने, ‘हाम्रो मातहतका प्रहरी कार्यालयबाट २५ जनालाई आजै पक्राउ गरिएको हो । यसरी पक्राउ परेकामा बहु विवाहदेखि, डाँका, लागूऔषध, कुटपिट, जालसाँजी, सम्बन्ध बिच्छेद आदि मुद्दाका सजाय नभोगेका व्यक्तिहरु छन् ।’

तनहुँ प्रहरीले पछिल्लो समय अदालतका फैसला कार्यान्वयनमा चासो दिंदै आइरहेको छ ।

यस अघि पनि एकै पटक ३३ जनालाई पक्राउ गरिएको थियो ।

अधिकांशलाई अदालतमा उपस्थित गराइएकामा उनीहरु जरिवाना पश्चात अदालतको आदेशबाट कारागार चलान भएको प्रवक्ता तिमल्सेनाले बताए ।