गण्डकी छड्के टेलिभिजन कार्यक्रमबाट राष्ट्रिय ख्याती आर्जन गरेका पत्रकार अपिल त्रिपाठीले आफू नियमित हिँड्ने सडकको खाल्डो आफै पुर्छु भन्दै स्थानिय सरकारसँग अनुमति मागेका छन् ।

स्मार्ट सिटीको नारा अघि सार्दै खाल्डो देखेमा १ घण्टामा पुर्ने योजना अघि सारेर जितेका पोखरा महानगरका मेयर मानबहादुर जिसीलाई मात्र अपिलले यो नैतिक दबाब सिर्जना गर्न खोजेका हैनन्, पोखरा गण्डकी प्रदेशको राजधानी भएको र सरकार समेत यहीँ भएकाले एक्लो नागरिककोे यो काम सरोकारवाला निकायलाई लाजमर्दो बन्ने निश्चित छ ।

अपिलले महेन्द्रपुल र पालिखेचोकमा बनेका ठूला खाल्डाले आफ्नो नियमित आवतजावतमा समस्या परेको भन्दै सो खाल्डो आफ्नै श्रोत साधनमा पुरिदिने र यसका लागि अनुमति दिन पोखरा वडा नं. ३ र वडा नं. ४ कार्यालयलाई निवेदन दिएका छन् । वडा नं. ३ का अध्यक्ष रबिन्द्र बहादुर प्रजु र वडा नं. ४ का अध्यक्ष शंकरप्रसाद बास्तोलालाई नै भेटेर निवेदन बुझाएका हुन् ।

उनले फेसबुकमा लेखेका छन्ः ‘सरकारसँग केही गुनासो छैन । आज कसैसँग केही प्रश्न गर्दिनँ । पोखराको महेन्द्रपुल र पालिखेचोक जस्तो सडकमा भएका डरलाग्दा खाल्डा आज आफै पुरिन्छ ।’