शनिबार भएको छुटाछुटै सवारी दुर्घटनामा परी तीन जनाको मृत्यु भएको छ भने ४७ जना घाइते भएका छन् । मकवानपुरको मनहरी–६, सुनाचुरीमा रात्रीबस र ट्रक ठोक्किँदा तीन जनाको मृत्यु भएको छ भने १० जना घाइते भएका छन्।

हेटौंडाबाट चितवनतर्फ जादै गर्दा शनिबार बिहान ३ बजेतिर बस र ट्रक एकआपसमा ठोक्किएर दुर्घटना हुँदा बसका चालकसहित ३ जनाको मृत्यु भएको हो । हेटौंडाबाट चितवनतर्फ जाँदै गरेको ना.४ ख ५१४९ नम्बरको बस र विपरीत दिशाबाट हेटौंडा आउँदै गरेको ना।६ ख ८९ नम्बरको ट्रक एक आपसमा ठक्किँएका हुन् ।

मृत्यु हुनेमा बस चालक वीरगञ्ज–१५ का ३५ वर्षीय मदनकुमार थापा, बसमा सवार भारत सिस्वाका अन्दाजी ४० वर्षीय अभयलाल कुशवाह र भारत बिहारका ४० वर्षीय सुनिल कुमार रहेको प्रहरीले जनाएको छ । बस चालक थापा र कुमारको उपचारको क्रममा चितवनस्थित पुरानो मेडिकल कलेज र कुशवाहको हेटौंडा अस्पतालमा उपचारका क्रममा मृत्यु भएको हो ।

दुर्घटनामा बस र ट्रकका गरी १० जना घाइते भएको र उनीहरुको हेटौंडा अस्पतालमा उपचार भइरहेको इलाका प्रहरी कार्यालय मनहरी प्रहरी कार्यालयले बजनाएको छ ।

त्यसैगरि, बाँकेको राप्ती सोनारी गाउँपालिका–३ बैसामा बस दुर्घटना भएको छ । ना ३ ख ९७५९ नम्बरको बस गएराति दुर्घटना हुँदा ३७ जना घाइते भएको र एकजना गम्भीर रहेको जिल्ला प्रहरी कार्यालय बाँकेले जानकारी दिएको छ ।

दुर्घटनाग्रस्त बस राप्ती सोनारीबाटै दाङको देउखुसी दुलही पु-याउन हिँडेको प्रहरीले जनाएको छ । दुर्घटनामा घाइते हुने सबै राप्ती सोनारीकै रहेको र उनीहरुको कोहोलपुर मेडिकल कलेजमा उपचार भइरहेको छ ।