पोखराका परिचित डा. अमर नागिला पोखरा विश्वविद्यालयको स्वास्थ्य विज्ञान संकायको डिनमा नियुक्त भएका छन् । विश्वविद्यालयको सोमबार बसेको कार्यकारी परिषद्ले डा. नागिलालाई डिनमा नियुक्त गरेको हो । नागिला हाल स्कूल अफ हेल्थ एण्ड एलाईड साइन्सेसका सहप्राध्यापक हुन् ।

यस्तै, परिषद्ले मानविकी तथा समाजशास्त्र संकायको डिनमा डा. अजय थापा र विज्ञान तथा प्रविधि संकाय डिनमा डा. रमेशकुमार ठगुराठीलाई नियुक्त गरेको विश्वविद्यालयका सूचना अधिकारी लोकप्रसाद ढकालले जानकारी दिए ।

डा. अजय स्कूल अफ डेभलपमेन्ट एण्ड सोसल ईञ्जिनियरिङका सह–प्राध्यापक हुन् भने डा. ठगुराठी स्कुल अफ ईञ्जिनियरिङका सह–प्राध्यापक हुन् । डिनको कार्यकाल चार वर्ष हुन्छ ।

विश्वविद्यालयको परीक्षा नियन्त्रकमा चार वर्षका लागि डा. तुल्सीराम भण्डारी नियुक्त भएका छन् । भण्डारी स्कूल अफ हेल्थ एण्ड एलाईड साइन्सेसका सह–प्राध्यापक हुन् ।

डा. नागिला पोखरामा न्यूरोडमा रहेको लाइफकेयर डाइग्नोस्टिक एण्ड रिसर्च सेन्टरका सञ्चालक हुन् । जुन ल्याब पोखरामा प्राइभेट क्षेत्रबाट पीसीआर परिक्षण गर्ने पहिलो ल्याब हो ।

यही ल्याबमा तीन साता अघि गण्डकी प्रदेशका एक सांसदको रिपोर्ट तुरुन्तै पोजिटिभ आएको भनेर चर्को बहस भएको थियो । राष्ट्रिय जनमोर्चा सांसद खिमविक्रम शाहीको वैशाख १४ गते निकालिएको स्वाबको नतिजा १५ वैशाखमा प्रदेश स्वास्थ्य निर्देशनालयको ल्याबबाट नेगेटिभ आएको थियो । जबकि त्यही दिन लाइफकेयरमा पोजिटिभ आएको थियो ।

अविश्वास प्रस्तावमाथि मतदान हुने कार्यसूची रहँदाकै दिन निर्णायक मत रहेका सांसद शाहीलाई चरक हस्पिटलमा कोरोना आईसियू कक्षामा राखेर लाइफ केयरबाट पोजिटिभ रिपोर्ट निकालेको भनेर जनस्तरमा चर्चा चलेको थियो ।

ल्याबको आलोचना हुन थालेपछि डा. नागिलाले राजनीतिक जोडघटाउसँग आफ्नो ल्याबको कुनै सम्बन्ध नरहेको स्पष्टीकरण विज्ञप्तिमार्फत दिएका थिए । आजको नियुक्ति बाघ कराउनु र बाख्रा हराउनु झैं भएको छ । यद्यपी, उनलाई नजिकबाट चिन्नेहरु डा. नागिला सक्षम र योग्य व्यक्ति हुन् भन्छन् ।

डा. श्रीकृष्ण पोखरा स्वास्थ्य विज्ञान प्रतिष्ठानका डिन

यस्तै, पोखरा स्वास्थ्य विज्ञान प्रतिष्ठानको डिनमा डा. श्रीकृष्ण श्रेष्ठ नियुक्त भएका छन् । यसअघि प्रतिष्ठानको डिनमा डा. नरेन्द्रविक्रम गुरुङ थिए । यस्तै, प्रतिष्ठानको डाईरेक्टरमा डा. भरत खत्री नियुक्त भएका छन् ।

प्रतिष्ठानका उपकुलपति डा. डुकबहादुर क्षत्रीले सोमबार श्रेष्ठलाई डिन नियुक्त गरेका हुन् । वरिष्ठ बाल रोग विशेषज्ञ डा. श्रेष्ठ तत्कालिन पश्चिमाञ्चल क्षेत्रीय अस्पतालको पूर्व मेडिकल सुपरिटेन्डेण्ट थिए ।

भक्तपुरको सूर्यविनायक नगरपालिका वडा नं २ बालकोटमा निवासी डा. श्रेष्ठ विगत दुई दशकभन्दा बढी समयदेखि स्वास्थ्य क्षेत्रमा आवद्व छन् ।