पूर्व फुटबल खेलाडी तथा प्रशिक्षक बिल तामाङको पोखरामा निधन भएको छ । हाल सहारा हङकङका उपाध्यक्ष रहेका उनी सहारा क्लबका पूर्व खेलाडी तथा प्रशिक्षक थिए ।

कोभिड १९ बाट संक्रमित भएका तामाङको उपचारको क्रममा निधन भएको । दुई साता अघि संक्रमण पश्चात गण्डकी मेडिकल कलेज (जिएमसी)मा उपचारर्थ तामाङको मंगलबार बिहान ३ः३० मा निधन भएको हो ।
सहारा क्लव पोखरामा प्रशिक्षकको रुपमा २०५८ सालबाट आवद्ध तामाङले हालै मात्र एफसी÷एन्फा ‘ए’ लाइसेन्स प्राप्त गरेका थिए । सन २००१ देखि २००३ सम्म भारतको पटियालामा प्रशिक्षण लिएर फुटबल प्रशिक्षणमा ‘फर्ष्ट क्लास’ भएका उनी नेपाली फुटबल प्रशिक्षक ‘फर्ष्ट क्लास’ हुने पहिलो नेपाली फुटबल प्रशिक्षक समेत थिए ।

उनी भन्थे– ‘हङकङमा बसेर पनि मैले नेपाली पासपोर्ट त्यागेको छैन, म आफ्नो जन्म भूमीमा केही गरेर देखाउन चाहन्छु, मलाई यसमा झिनो आशा अझै बाँकी छ ।’ पोखरा १३, संगमटोल निवासी तामाङ गत फागुनमा हङकङबाट एफसी लाइसेन्सका लागि नेपाल आएका थिए ।

पूर्व राष्ट्रिय फुटबल खेलाडीसमेत रहेका बिल सहारा क्लवमा प्रशिक्षकको रुपमा आवद्ध रहँदा धेरै पोखरेली फुटबल खेलाडी उत्पादनमा अहम् भूमिका खेलेका थिए । ४५ वर्षिय तामाङका श्रीमती र एक छोरा छन् । उनको निधनमा सहारा क्लबलगायत फुटबल सम्बद्ध संघसंस्था एवं शुभेच्छुकले शोक व्यक्त गरेका छन् ।