पोखरा ।  बालिकालाई जबर्जस्ती करणी गरी गोप्य भिडियो खिचेर सामाजिक संजालमा पोष्ट गरेको अभियोगमा कास्की प्रहरीले एक जनालाई पक्राउ गरेको छ ।

पोखराकी एक १६ वर्षीया बालिकालाई भारत बिहार प्रदेश पश्चिमी चम्पारण जिल्ला बथना घर भइ हाल पोखरा महानगरपालिका -९ शान्तिवन बस्ने २७ वर्षीय इन्द्रजित कुमार शर्माले ललाई फकाई विभिन्न प्रलोभनमा पारी डर, धाकधम्की दिएर जबर्जस्ती करणी गरेको अभियोगमा पक्राउ गरिएको कास्कीका प्रहरी नायव उपरीक्षक तथा प्रहरी प्रवक्ता सुवास हमालले जानकारी दिए ।

हमालका अनुसार शर्माले करणी गरी गोप्य भिडियो तथा फोटोहरु बालिकाकै नाउँमा नक्कली फेसबुक अकाउन्ट बनाएर अपलोड गरिदिएको भन्दै उनीविरुद्ध परिवारले जाहेरी दिएका थिए । जाहेरीका आधारमा शर्मालाई बुधबार पोखराको चाउथेबाट प्रहरीले पक्राउ गरेको हो ।

पक्राउ परेका प्रतिवादी शर्मा विरुद्ध जबर्जस्ती करणी कसुरमा जिल्ला अदालत कास्कीबाट १० दिनको म्याद थप गरी अनुसन्धान प्रक्रिया अगाडी बढाइएको प्रवक्ता हमालले जानकारी दिए ।