काठमाडौँ । जनकपुर–जयनगरको रेलवे ‘ट्रयाक स्पीड’ परीक्षण सफल भएको छ । रेल खरिद गरी ल्याइएको दश महिनापछि हिजो आइतबार नेपाल–भारत सीमावर्ती क्षेत्रको उक्त रूटमा रेल सञ्चालनका लागि रेलवे ट्र्याकको संरचनाका साथै स्पीड परीक्षण गरिएको हो ।

परीक्षण सफल भएसँगै नेपालमा रेल सञ्चालनका लागि बाटो खुलेको छ । यद्यपि नियमित रूपमा ती रेल कहिले सञ्चालन हुन्छन् भन्ने विषय भने यकिन भइसकेको छैन ।

अन्तरदेशीय रेलमार्ग सञ्चालनका लागि नेपाल रेलवे कम्पनीले आइतबार भारतको रेल ल्याएर ट्र्याक परीक्षण गरेको हो । भारतको विहारस्थित जयनगर स्टेशनदेखि नेपालको जनकपुर कुर्था स्टेशनसम्म (३५ किलोमीटर लामो) परीक्षणका लागि सञ्चालन गरिएको रेल २३ मिनेटमा आइपुगेको कम्पनीका महाप्रबन्धक गुरु भट्टराईले जानकारी दिए । जयनगरबाट नेपालकोे रूटमा आउँदा लगभग प्रतिघण्टा ६० किलोमीटर (किमी)को गति रहेको भन्दै उनले जनकपुरको कुर्था स्टेशनबाट फर्किंदा भने प्रतिघण्टा ११५ किमीको गति रहेको जानकारी दिए ।

रेल सञ्चालनका लागि भाडादरसमेत निर्धारण गरिएको छ । न्यूनतम रू. १५ सम्म तोकिएको र प्रतिघण्टाका हिसाबले रू. २ थपिँदै जाँदा उक्त रूटमा आवतजावत गर्दा प्रतियात्रुले रू. ७५ सम्म तिर्नुपर्ने व्यवस्था गरिएको छ । रेलमा डिलक्स सीट पनि भएकाले त्यसमा यात्रा गर्न चाहनेको लागि प्रतियात्रु रू. ३०० भाडादर कायम गरिएको छ।

रेलमा ७६ ओटा डिलक्स सीट रहेका छन् । यससँगै सामान्य सीट तथा उभिएर एउटा रेलमा झन्डै १३ सय मानिसले यात्रा गर्न सक्छन् ।

सरकारले जिटुजी (गभर्मेन्ट टू गभर्मेन्ट) प्रक्रिया मार्फत ८४ करोड ६५ लाख ९५ हजार रुपैयाँमा भारतसँग खरिद गरेको दुईवटा रेल गत वर्ष असोज २ गते जनकपुर रेल्वे स्टेशनमा पार्किङ अवस्थामा राखिएको छ ।