विश्व फुटबलका सुपरस्टार लियोनल मेस्सीले रुँदै बार्सिलोना छाडेका छन् । क्लब छाड्नुअघि क्याम्प नाउमा आयोजित प्रेस मिटमा गहभरी आँसु लिएर ड्यासमा उपस्थित मेस्सी आफ्नो भनाई राखेपछि अन्तिममा भक्कानिएर रोए । हलमा उपस्थित सबैले गड्गडाहट तालीले सम्मान दर्शाएपछि उनले आफूलाई रोक्न सकेनन् । पत्नी र सन्तान पनि प्रेस मिटमा उपस्थित थिए ।

Pic. FC Barcelona Youtube Live

निरन्तर २१ वर्ष बार्सिलोनामा बिताएका मेस्सीले आफूले क्लब छाड्ने कहिल्यै कल्पना नगरेको बताए । जहाँबाट मेस्सीले फुटबल यात्रा अघि बढाए, अहिले सोहि क्लब छाड्नुपर्दा मेस्सी अत्यन्त दुःखित बने । ‘म र मेरो परिवार यही बस्न तयार भएका थियौं’ उनले भनेका छन् ।

गत वर्ष प्रशिक्षकका कारण मेस्सीले क्लब छाड्न चाहेका थिए तर अहिले त्यो मतभेदको अवस्था थिएन । नयाँ प्रशिक्षक आएपछि बार्सिलोनामै ५ वर्षको सम्झौता गर्ने तयारी समेत भएको थियो । सन् २००४ देखि ‘क्याम्प नाउ’बाट फुटबल खेल्दै आएका मेस्सी सन् २०२६ सम्म ‘क्याम नाउ’मै बस्ने तयारीमा देखिएका थिए । कोपा अमेरिका उपाधि जितेर अर्जेन्टिनाबाट बार्सिलोना फर्केका मेस्सीसँग सम्झौता नवीकरण गर्ने पक्षमा बार्सिलोना पनि थियो ।

नयाँ सम्झौताका लागि मेस्सी तयार रहे पनि आर्थिक कारणले त्यो सम्भव नभएपछि उनले बार्सिलोना छाडेका हुन् । उनले क्लबको आर्थिक अवस्थाका कारण ५० प्रतिशत तलब घटेर पनि बस्न राजी भएको समाचार आएका थिए । क्लबको आर्थिक समस्या र ला लिगाको नियमका कारण मेस्सीले आफूले दुई दशक बिताएको क्लब छाड्नुपर्यो भने क्लबले पनि मेस्सी गुमाउनुपर्यो ।

यससँगै आधुनिक फुटबलका एक महान खेलाडीको क्याट्लान क्लब बसाई औपचारिक रुपमै टुंगिएको छ । मेस्सी बार्सिलोनामा २१ वर्ष रहे । जसमध्ये उनले सिनियर टीममा १७ वर्ष बिताए ।

बार्सिलोनाबाट मेस्सी अलग हुने भए पछि उनी कुन क्लबमा आवद्ध होलान् भन्ने चासोका साथ हेरिएको छ । जुन ३० तारीखमा औपचारिक रूपमा बार्सिलोनासँग सम्झौता अन्त्य भएसंगै मेस्सी कुनै क्लबसँग आबद्ध थिएनन्।अन्तर्राष्ट्रिय सञ्चारमाध्यमका अनुसार उनी पेरिस सेन्ट जर्मन (पीएसजी) मा आवद्ध हुने सम्भावना लगभग निश्चित छ ।

Pic. FC Barcelona Youtube Live

पीएसजीसँग मेस्सीले दुई वर्षका लागि सम्झौता गर्न सक्ने र त्यसका लागि क्लबले करबाहेक वार्षिक ४ करोड युरो तलब दिने तयारी गरेको बताइएको छ । पीएसजीमा बार्सिलोनामा मेस्सीसँगै खेलेका ब्राजिलियन स्टार नेयमार पनि छन् । नेयमार भन्दा मेस्सीले बढी तलब लिनेछन् । नेयमारले लगाइरहेको जर्सी १० भने मेस्सीले नलगाउने बुझिएको छ । यद्यपी, मेस्सीका लागि नेयमारले १० नं. जर्सी छाड्न तयार रहेको अन्तर्राष्ट्रिय सञ्चारमाध्यमले जनाएका छन् । बार्सिलोनामा रहँदादेखि नै निकट मित्र उनीहरु एकै क्लबमा रहँदा खुशी भएका छन् ।