पहिरोबाट भएको क्षति अवलोकनको लागि पुगेका बुटवल उपमहानगरपालिकाका प्रमुख शिवराज सुवेदीमाथि मुक्का प्रहार गर्ने युवक पक्राउ परेका छन् । मेयरलाई मुक्का प्रहार गर्ने गणेश पंगेनीलाई सोमबार साँझ प्रहरीले बुटवलबाट पक्राउ गरेको हो ।

पक्राउ परेका पंगेनीलाई इलाका प्रहरी कार्यालय बुटवलमा राखिएको ईलाका प्रहरी कार्यालय बुटवलका प्रमुख प्रहरी नायब उपरीक्षक मदन कुँवरले जानकारी दिए । पंगेनी पहिरो प्रभावित ज्योतिनगरकै बासिन्दा हुन् ।

लुम्बिनी वाणिज्य क्याम्पस बुटवलका विद्यार्थी उनी अनेरास्ववियू रुपन्देही जिल्ला कमिटी सदस्य समेत हुन् । पंगेनीमाथि अनुसन्धान गरेर दुर्व्यवहार वा शान्ति सुरक्षासम्बन्धी मुद्दामा कारकाही हुने डीएसपी कुँवरले बताए ।

मेयरमाथि मुक्का प्रहार भएपछि बुटवल उपमहानगरपालिका र एमाले बुटवल उपमहानगर कमिटीले पक्राउ गरी कारबाही गर्न माग गरेका थिए । डीएसपी  कुँवरले यसअघि भने पहिरो प्रभावित केही व्यक्तिले मेयर सुवेदीसँगै पहिरो अवलोकनको लागि पुगेको टोलीमाथि आक्रोश व्यक्त गरेको भए पनि चर्चा गरिएजस्तै कुटपिट नै नभएकोले पक्राउ नगरिएको बताएर पक्राउ गरिरहन नपर्ने बताएका थिए ।