पछिल्लो २४ घण्टामा गण्डकीका ६४ जनामा कोरोना पुष्टि भएको छ।

प्रदेश स्वास्थ्य निर्देशनालयको कोरोना सम्बन्धी विज्ञप्ति अनुसार पछिल्लो २४ घण्टामा गण्डकीका ५०४ जनामा गरिएको नमुना परीक्षणमा उक्त संख्याका मानिसको रिपोर्ट कोरोना पोजेटिभ आएको हो ।

संक्रमण पुष्टि हुनेमा गण्डकीका आठ जिल्लाका छन् । जसअन्तर्गत कास्कीका २९ जना, तनहुँका एक जना, गोरखाका एक जना र नवलपुरका तीन जना छन्। यस्तै, स्याङ्गजाका एक जना, पर्वतका पाँच जना, बागलुङका १७ जना र म्याग्दी जिल्लाका सात जनामा कोरोना पुष्टि भएको छ। संक्रमण पुष्टि भएकासँगै गण्डकीमा कोरोना संक्रमितको कूल संख्या ८७ हजार ४१३ पुगेको छ ।

पछिल्लो २४ घण्टामा गण्डकीबाट ५२ जना कोरोनामुक्त भएका छन् । योसँगै, प्रदेशमा कोरोनामुक्त हुनेको संख्या ८५ हजार ४८० पुगेको छ। अहिले प्रदेशभर ५३६ सक्रिय संक्रमित छन् ।

मंगलबार गण्डकीमा थप एक जनाको कोरोना संक्रमणका कारण मृत्यु पुष्टि भएको छ। मृतक कास्की जिल्ला पोखरा महानगरपालिका -१४ निवासी ७४ वर्षीया वृद्धा छिन्।

योसँगै, गण्डकीमा कोरोना संक्रमणका कारण ज्यान गुमाउनेको संख्या १३९६ पुगेको निर्देशनालयले जनाएको छ।