पोखरा। पोखरामा बालबालिकाको कानमा लगाएको सुनको मुन्द्रा चोरी गर्दै हिँड्ने एक युवतीलाई कास्की प्रहरीले पक्राउ गरेको छ।

पोखरा महानगरको विभिन्न स्थानहरुमा अन्दाजी ५ वर्ष देखि ९ वर्षसम्मका बालबालिकालाई ललाई फकाई तथा विभिन्न डर त्रास र धम्की दिएर कानमा लगाएको सुनको मुन्द्रा चोरी गर्दै हिँड्ने एक युवतीलाई पक्राउ गरेको कास्कीका प्रहरी नायव उपरीक्षक तथा प्रहरी प्रवक्ता सुन्दर तिवारीले जानकारी दिए।

तिवारीका अनुसार विशेष सूचनाका आधारमा वडा प्रहरी कार्यालय रामबजारबाट खटिएको प्रहरीको टोलीले पीडितहरुले दिएको हुलियाका आधारमा खोजी तथा अनुसन्धान गर्दै जाँदा स्याङ्गजा जिल्ला चापाकोट नगरपालिका वडा नं -४ स्थायी घर भै हाल पोखरा -१४ चाउथे बस्दै आएकी २४ वर्षीया अम्बिका पुलामी मगरलाई प्रहरीले पक्राउ गरेको हो।

प्रहरीले उनको साथबाट सुनको मुन्द्रा १३ थान (४८ लाल ) र सुनको ६ थान मुन्द्रा (४५ लाल) वरामद गरेको छ।

पक्राउ परेकी पुलामीलाई जिल्ला अदालत कास्कीबाट चोरी तथा डाँका सम्बन्धी कसुरमा पाँच दिनको म्याद थपको अनुमति लिएर आवश्यक अनुसन्धान प्रक्रिया अगाडि बढाइएको प्रवक्ता तिवारीले जानकारी दिए।